पंढरपूरः पोलिसनामा आॅनलाईन
माजी मंत्री आमदार पतंगराव कदम यांच्या अस्थींचे आज चंद्रभागेत विधीवत विसर्जन करण्यात आले. काँग्रेसचे जेष्ठ नेते, दिवंगत आमदार कदम यांचे चिरंजीव विश्वजीत कदम यांच्यासह कदम कुटूंबीयातील सदस्य, काँग्रेस, राष्ट्रवादीचे पदाधिकारी यावेळी उपस्थित होते.
चंद्रभागा नदीत दिवंगत आमदार कदम यांच्या अस्थींचे विसर्जन करण्याकरिता त्यांच्या अस्थी आज (सोमवार) दुपारी 3 वाजण्याच्या सुमारास पंढरपुरात आणण्यात आल्या. श्री. विठ्ठल मंदिरासमोर संत नामदेव पायरी येथे अस्थी कलशाचे पुजन करण्यात आले. विधीवत पूजन करून अस्थींचे चंद्रभागा नदीत विसर्जन करण्यात आले. याप्रसंगी आमदार कदम यांचे पुत्र विश्वाजीत कदम आणि त्यांच्या कुटूंबीयांपैकी शांताराम कदम, राजेंद्र जगताप, कुंडलीक गायकवाड,चंद्रशेखर कदम, आदी आले होते. तर छत्रपती शिवाजी चौकात काँग्रेस आणि राष्ट्रवादी काँग्रेसच्या पदाधिकारी, कार्यकर्त्यांसह नागरिक मोठ्या संख्येने उपस्थित होते.