औरंगाबाद : पोलीसनामा ऑनलाईन – लोकसभा निवडणूकीत विजय मिळविलेल्या खासदार इम्तियाज जलील यांच्या अभिनंदनाचा प्रस्ताव आज औऱंगाबाद महानगरपालिकेच्या सर्वसाधारण सभेत आज मांडण्यात आला. त्याला महापौर नंदकुमार घोडेल यांनी या प्रस्तावाला विरोध केल्याने सभेत मोठा गोंधळ झाला. या गोंधळात एमआयएमच्या एका नगरसेवकाने राजदंडही पळविण्याचा प्रयत्न केला. त्यानंतर महापौरांनी वाढत्या गदारोळामुळे एमआयएमच्या ६ नगरसेवकांना एक दिवसासाठी निलंबित केले होते. मात्र त्यानंतर पुन्हा आक्रमक झालेल्या एमआयएम नगरसेवकांनी सभेतच आंदोलनाला सुरुवात केली. त्यानंतर त्यांनी २० नगरसेवकांना निलंबित केले.
लोकसभा निवडणूकीनंतरची महापालिकेची पहिलीच सर्वसाधारण सभा वादग्रस्त ठरली. नवनिर्वाचित खासदार इम्तियाज जलील यांचा अभिनंदन ठराव आणि शहरातील पाणी प्रश्न यावरून आज सर्वसाधऱण सभेत गोंधळ झाला. एमआयएमच्या सदस्यांनी प्रथम खासदार जलील यांच्या अभिनंदनाचा ठराव मांडला. मात्र भाजप सदस्यांनी पाणी प्रश्न महत्वाचा असल्याचे सांगत या प्रश्नावरून महापौरांच्या डायससमोर धाव घेतली. त्यानंतर भाजप सदस्यांनी महापौरांच्या डायससमोर ठिय्या आंदोलनाला सुरुवात केली. त्याचवेळी भाजपच्या सदस्यांनी महापौरांच्या डायसवरील राजदंड पळविला मात्र तो अफसर खान यांनी परत आणून ठेवला. काही वेळातच एमआयएमचे नगरसेवक तेथे आले. त्यांनीही महापौरांचा राजदंड पळविण्याचा प्रयत्न केला. यानंतर महापौर घोडले यांनी एमआयएमच्या नगरसेवकांना दिवसभरासाठी निलंबित केले.
मात्र यानंतर आक्रमक झालेल्या एमआयएम नगरसेवकांनी महापौर सत्तेचा दुरुपयोग करत असून जातीवाद करत आहेत. असा आरोप करत खासदार इम्तियाज जलील यांचे अभिनंदन केल्याशिवाय उठणार नाही. अशी भुमिका घेत आंदोलन केले. त्यानंतर महापौर घोडाले यांनी २० नगरसेवकांना निलंबित केले आहे.
आधीच सिद्धार्थ उद्यानातील बछड्यांच्या नामकरण सोहळ्याला नवनिर्वाचित खासदार इम्तियाज जलील यांना निमंत्रण न देता माजी खासदार चंद्रकांत खैरे यांना बोलविण्यात आले. त्यामुळे यासंदर्भात वाद आणखी पेटला होता.