पोहरादेवीच्या महंतासह कुटुंबातील 4 कोरोना पॉझिटिव्ह, संजय राठोडांच्या शक्तिप्रदर्शनामुळं ‘गोत्यात’

पोलिसनामा ऑनलाईन : पोहरादेवी येथे दोन दिवसांपूर्वी वनमंत्री संजय राठोड यांच्या शक्ती प्रदर्शनात हजारो नागरिक उपस्थित होते. त्यामुळे अनेक जणांना कोरोनाची लागण झाल्याची भीती वर्तवली जात आहे. त्यातच एका महंतासह कुटुंबातील चार जण कोरोना पॉझिटिव्ह आढळले आहे. या प्रकरणात कोरोना रुग्णाचा आकडा वाढण्याची शक्यता वर्तवली जात आहे.

दरम्यान, याच गावातील इतर ३ जणही कोरोना पॉझिटिव्ह आढळून आल्यामुळे गावात खळबळ उडाली आहे. पोहरादेवी इथे झालेल्या गर्दीबाबत मुख्यमंत्री उद्धव ठाकरे यांनी गंभीर दखल घेतली. स्वतःच्याच मंत्रिमंडळातल्या एका मंत्र्यांनी तिथे उपस्थिती लावली होती. तरीही मुख्यमंत्री ठाकरे यांनी याबाबत कडक धोरण अवलंबलं आहे. ‘कोविडसंदर्भात आरोग्याचे नियम सर्वाना सारखेच’, असं म्हणत गर्दीबाबत प्रशासनाने तत्काळ कारवाई करावी, असे आदेश दिले आहेत.
कोविडच्या काळात अशा रीतीने आरोग्याचे नियम न पाळता गर्दी होत असेल तर संबंधितांवर जिल्हा व पोलीस प्रशासनाने तत्काळ कारवाई करावी असे आदेश आता मुख्यमंत्र्यांनी दिले आहेत. वाशिम जिल्हाधिकारी आणि जिल्हा पोलीस अधीक्षक यांना या प्रकराचा अहवाल देण्यास सांगण्याच्या सूचना मुख्य सचिवांना दिल्या आहेत.