मुंबई :वृत्तसंस्था – बॉलिवूडचे दिवंगत जेष्ठ अभिनेता विनोद खन्ना यांच्या पत्नी गीतांजली खन्ना (७०) यांचे निधन झाले आहे. अलिबागमधील मांडवा येथे त्यांच्या फार्म हाऊस वर त्यांनी अखेरचा श्वास घेतला. काल सकाळी गीतांजली खन्ना या मुंबई येथून मांडवा येथे आल्या होत्या. रात्री त्यांना त्रास जाणवू लागल्यानंतर खाजगी डॉक्टरला तपासणीसाठी बोलावण्यात आले. त्यानंतर काही वेळातच गीतांजली यांचे निधन झाले. गीतांजली या विनोद खन्ना यांच्या पहिल्या पत्नी.व अभिनेता राहुल खन्ना आणि अक्षय खन्ना यांच्या मातोश्री होत्या.
विनोद खन्ना यांच्याशी गीतांजली यांनी १९७१ मध्ये लग्न केले होते. पण अचानक विनोद खन्ना यांनी आपले फिल्मी करिअर, कुटुंब सगळे काही मागे सोडले आणि ओशो आश्रमात गेले यानंतर गीतांजली त्यांच्यावर नाराज झाल्या होत्या. १९८५ मध्ये या दोघांचा घटस्फोट झाला.
या घटस्फोटानंतर पाच वर्षांनी म्हणजे १९९० मध्ये विनोद खन्ना यांनी दुसरे लग्न कविता यांच्याशी केले कवितापासून विनोद खन्ना यांना साक्षी हा मुलगा व श्रद्धा ही मुलगी अशी दोन मुले झाली. पहिल्या पत्नीपासून घटस्फोट होऊनही विनोद यांनी आपले पित्याचे कर्तव्य निभावले. बॉलिवूड मध्ये अक्षय खन्नाला लॉन्च करण्यासाठी ‘हिमालय पुत्र’ हा चित्रपट बनवला. २७ एप्रिल २०१७ रोजी विनोद खन्ना यांचे निधन झाल्यानंतर. आता पाठोपाठ त्यांच्या पहिल्या पत्नी गीतांजली यांनीही या जगाचा निरोप घेतला.