अभिनेत्री सोनाक्षीच्या अडचणीत वाढ गुन्हा दाखल

नवी दिल्ली : वृत्तसंस्था – बॉलिवूड अभिनेत्री सोनाक्षी सिन्हा हिच्या अडचणीत वाढ होण्याची शक्यता आहे. कारण उत्तर प्रदेशातल्या मुरादाबाद जल्ह्यात सोनाक्षी सिन्हासह पाच जणांविरोधात फसवणुकीचा गुन्हा दाखल करण्यात आला आहे. मुरादाबादच्या कटघर परिसरात २४ नोव्हेंबर रोजी दिलेल्या तक्रारीच्या आधारावर हा गुन्हा दाखल झाला आहे. याशिवाय टॅलेंट फुल ऑन कंपनीचे अभिषेक सिन्हा, मालविका पंजाबी, धूमिल ठक्कर आणि अॅडगर सकारिया यांना आरोपी बनवलं आहे.

काय आहे प्रकरण ?
दिल्लीमध्ये ३० सप्टेंबर २०१८ रोजी इंडिया फॅशन अँड ब्युटी अवॉर्ड कार्यक्रमाचं आयोजन केलं होतं. पुरस्कार वितरणासाठी सोनाक्षी हजर राहणार होती. यासाठी प्रमोद शर्मा यांनी टॅलेंट फुल ऑन कंपनीसोबत करार केला होता. त्यांच्या दाव्यानुसार, सोनाक्षीच्या सचिवाशी बातचीत केल्यानंतर ३२ लाख रुपये तिच्या खात्यात जमा करण्यात आले. परंतु तिने अखेरच्या क्षणी कार्यक्रमाला उपस्थित राहण्यास नकार दिला.

त्यानंतर शो रद्द केल्यामुळे कार्यक्रमाचे आयोजक प्रसाद शर्मा यांनी तिच्याविरोधात गुन्हा दाखल केला. मात्र कोणतीही कारवाई न झाल्याने त्यांनी विष प्राशन केलं होतं. वेळेत उपचार मिळाल्याने त्यांचा जीव वाचला.दुसरीकडे पोलिसांच्या माहितीनुसार, तपास पूर्ण झाल्यानंतर सोनाक्षीसह इतर आरोपींवर गुन्हा दाखल करण्यात आला. तक्रारदाराने दबाव टाकण्यासाठी विष प्राशन केलं.