शबरीमला मंदिर प्रवेश : अमित शहांची भूमिकाही महिलाविरोधी

कन्नूर : वृत्तसंस्था – केरळमधील डाव्यांचे सरकार अय्यप्पा भक्तांचे आंदोलन जबरदस्तीने दडपण्याचा प्रयत्न करीत आहे. हिंदूंच्या परंपरा नष्ट करण्याचा प्रयत्न सुरू आहे. याची मोठी किंमत केरळ सरकारला चुकवावी लागेल, असे म्हणत भाजपचे अध्यक्ष अमित शहा यांनी अय्यप्पा मंदिरातील महिलांना असलेल्या प्रवेशबंदीला समर्थन दिले आहे. तसेच मंदिरात महिलांना प्रवेश देण्यास विरोध करणाऱ्या आंदोलकांना त्यांनी पूर्ण पाठिंबा दिला. कन्नूर येथील भाजप जिल्हा कार्यालयाचे उद्घाटन अमित शहा यांच्या हस्ते झाले. यावेळी ते बोलत होते.

शहा म्हणाले, येथील राज्य सरकार पोलिस दलाचा वापर करून भक्तांचे आंदोलन दडपण्याचा प्रयत्न करीत आहे. सरकारने आरएसएस तसेच भाजपच्या कार्यकत्र्यांसह सुमारे दोन हजार कार्यकत्र्यांना अटक केली आहे. या विरोधामुळे मुख्यमंत्री पिनराई विजयन यांचे सरकार आगीशी खेळ खेळत आहेत. परंतु, भाजप अय्यप्पा भक्तांच्या पाठिशी आहे. न्यायालयाचा निर्णय लागू करणे अशक्य आहे. देशात अनेक मंदिरांत वेगवेगळ्या परंपरा आहेत. भगवान अय्यप्पा यांची अनेक मंदिरे असून, जिथे महिलांना प्रवेश दिला जातो.

शबरीमला मंदिरात अय्यप्पा यांची ब्रह्मचारी मूर्ती असल्यामुळे महिलांना येथे प्रवेश नाही. देशात अशीही अनेक मंदिरे आहेत, जिथे केवळ महिलांना प्रवेश दिला जातो आणि पुरुषांना दर्शनबंदी आहे. शबरीमलाबाबत वेगळी भूमिका कशासाठी घ्यायची? लोकांच्या भावनांचा आदर आपणच राखला पाहिजे, असे शहा म्हणाले. शहा यांनी आपल्या भाषणाची सुरुवात स्वामी सरनाम अय्यप्पा या मंत्राने केली.