मोहरमच्या मिरवणुकीदरम्यान बंगल्याचा स्लॅब कोसळला, 20 जण जखमी (व्हिडीओ)

नवी दिल्ली वृत्तसंस्था – आंध्रप्रदेशमध्ये मोहरम दरम्यान मोठी दुर्घटना घडली. बंगल्याची गच्ची कोसळून २० जण जखमी झाले आहेत. यामधील ५ जणांची प्रकृती चिंताजनक आहे. आंध्रप्रदेशच्या कर्नूल जिल्ह्यातील बी तांड्रापाडू गावामध्ये ही घटना घडली आहे.

मोहरमनिमित्त बी तांड्रापाडू गावामध्ये मिरवणूक काढण्यात आली होती. ही मिरवणूक पाहण्यासाठी एका बंगल्याच्या गच्चीवर अनेक जण उभे होते. त्यासोबत रस्त्यावर देखील मोठ्या संख्येने नागरिक उपस्थित होते. अशातच बंगल्याचा वरचा भाग कोसळला आणि त्यासोबतच मिरवणूक पाहण्यासाठी उभे असलेले लोकही खाली पडले. गर्दी खूप जास्त असल्यामुळे वरून पडलेले लोक हे खाली उभे असलेल्या लोकांवर पडले.
या दुर्घटनेमध्ये २० जण जखमी झाले. त्यांना ताबडतोब नजीकच्या रुग्णालयात हलवण्यात आले आणि जखमींवर तत्काळ उपचार सुरु करण्यात आले.