हैदराबाद : वृत्तसंस्था – तेलंगणा विधानसभा निवडणुकीच्या प्रचारादरम्यान सर्व राजकीय पक्ष एकमेकांवर टीका करीत आहेत. एमआयएमचे अध्यक्ष असदुद्दीन ओवैसी आणि काँग्रेस पक्षाकडून भाजपला लक्ष बनवण्यात येत असून भाजपवर वारंवार टिका केली जात आहे. याच पार्श्वभूमीवर उत्तर प्रदेशचे मुख्यमंत्री योगी आदित्यनाथ यांनी ओवैसींना थेट इशारा दिला आहे. भाजपा सत्तेत आल्यास ओवैसींना निजामाप्रमाणे हैदराबाद सोडून पळावं लागेल, असं आदित्यनाथ यांनी म्हटलं.
योगी आदित्यनाथ यांच्या या इशाऱ्याला ओवैसी प्रत्युत्तर देणार आहेत. याचे संकेत त्यांनी ट्विटरवरुन दिले आहेत. ‘संध्याकाळी ७ ते १० दरम्यान होणाऱ्या सभेतून योगींना उत्तर दिलं जाईल,’ असं ट्विट ओवैसींनी केलं आहे. हैदराबादमध्ये आयोजित करण्यात आलेल्या एका प्रचारसभेत बोलताना योगी आदित्यनाथ ओवैसींवर बरसले. ‘मी तुम्हाला विश्वास देतो की, तेलंगणात भाजपाची सत्ता आल्यास ओवैसींनी निजामासारखं हैदराबाद सोडून पळावं लागेल,’ असं योगी आदित्यनाथ म्हणाले.