नवी दिल्ली, वृत्तसंस्था : जगातील हेरगिरीच्या आरोपाने घेरलेल्या चीनची दूरसंचार उपकरणे तयार करणाऱ्या हुवावे कंपनीसाठी भारताकडून वाईट बातमी समोर आली आहे. देशातील सर्वात मोठी दूरसंचार कंपनी जिओने घरगुती तंत्रज्ञानाचा वापर करून 5G (Jio5G) सोल्यूशन विकसित केले आहे. रिलायन्स इंडस्ट्रीजचे चेअरमन मुकेश अंबानी यांनी आज याची घोषणा केली. ते म्हणाले की Jio5G सोल्यूशन इतर देशांमध्ये निर्यात होईल. रिलायन्सच्या 43 व्या एजीएमला ऑनलाईन संबोधित करताना अंबानी म्हणाले की, सरकार 5G सेवांसाठी स्पेक्ट्रमची घोषणा करताच जिओ 5G सेवा चाचणीसाठी सुरू केली जाईल. ते म्हणाले की, जिओ 5 जी चे फील्‍ड डिप्‍लायमेंट पुढील वर्षापासून सुरू होईल. मुकेश अंबानी म्हणाले की, जिओचा 5 जी सोल्यूशन इतर टेलिकॉम ऑपरेटरलाही उपलब्ध होईल.
मुकेश अंबानी यांनी ही घोषणा अशा वेळी केली आहे, जेव्हा संपूर्ण जग हूवावेच्याविरूद्ध जोरदार आवाज उठवत आहे. नुकतेच अमेरिकेचे परराष्ट्रमंत्री माईक पोंपिओ यांनी जिओचे कौतुक केले. ते म्हणाले की, जिओ ही एक स्वच्छ टेलिकॉम कंपनी आहे आणि ती हुवावेपासून मुक्त आहे. अमेरिकेनंतर ब्रिटनने आता 5 जी नेटवर्क तयार करण्यासाठी चिनी कंपनी हुवावेवर बंदी घातली आहे. ब्रिटीश सरकारने दूरसंचार कंपन्यांना 2027 पर्यंत 5 जी नेटवर्कवरून सर्व हुआवेची उपकरणे काढण्याचे आदेश दिले आहेत. यापूर्वीही अमेरिकेने सर्व हुवावे उपकरणांवर बंदी घातली होती.
राष्ट्रीय सुरक्षा परिषदेच्या बैठकीत निर्णय
ब्रिटनचे पंतप्रधान बोरिस जॉनसन यांच्या अध्यक्षतेखाली झालेल्या राष्ट्रीय सुरक्षा परिषदेच्या बैठकीनंतर निर्णय घेण्यात आला की देशातील 5 जी नेटवर्क बनविण्यात चिनी कंपनीचा सहभाग संपुष्टात येईल. राष्ट्रीय सायबर सुरक्षा परिषदेच्या अहवालाचा आढावा घेतल्यानंतर ब्रिटिश सरकारने हा निर्णय घेतला. चीनी कंपनी हुवावेवर डेटा चोरी आणि गुप्त माहिती लीक केल्याचा आरोप आहे. ब्रिटनचे संस्कृती सचिव ऑलिव्हर डोव्हन म्हणाले की, अमेरिकेच्या निषेधानंतर हुवावेच्या सुरक्षेबाबत चिंता वाढल्याचा इशारा राष्ट्रीय सुरक्षा परिषदेने दिला आहे. 5 जी नेटवर्कमध्ये हुवावेची उपस्थिती देशाच्या सुरक्षेसाठी धोकादायक ठरू शकते. हुवावे आपल्या उपकरणांच्या कोणत्याही सुरक्षेची हमी देण्यास सक्षम असेल यावर ब्रिटनला विश्वास नाही.
हुवावेसंदर्भात ब्रिटनवर दबाव आणत होता चीन
जूनच्या सुरुवातीस, अमेरिकेचे परराष्ट्रमंत्री माईक पोम्पीओ यांनी असा दावा केला की, लंडनस्थित एचएसबीसी बँकेमार्फत चीन आपल्या प्रकल्पांसाठी ब्रिटनवर दबाव आणण्याचा प्रयत्न करीत आहे. पोम्पीओ म्हणाले की, चीनने यूके बँक हांगकांग आणि शांघाय बँकिंग कॉर्पोरेशन (एचएसबीसी) यांना शिक्षा देण्याची धमकी दिली होती. असे म्हटले आहे की जर ब्रिटनने हूवावेला आपले 5 जी नेटवर्क तयार करण्याची परवानगी दिली नाही तर ते ब्रिटनमध्ये अणुऊर्जा प्रकल्प उभारण्याचे आश्वासनही मोडीत काढेल.