पुणे : पोलीसनामा ऑनलाइन – बीएचआर पतसंस्थेमध्ये गैरव्यवहार प्रकरणात पुणे पोलिसांनी टाकलेल्या धाडीत एक ट्रक भरुन पुरावे गोळा केले असून, त्यात वेगवेगळ्या १२ ठिकाणी टाकलेल्या धाडीत कागदपत्रे, शपथपत्रे, लॅपटॉप, पीसीओसह मोठ्या प्रमाणावर डिजिटल साहित्य मिळाले आहे. औरंगाबाद, जळगाव व इतर शहरात धाडी टाकल्या आहेत. असे असले तरी पुणे पोलिसांनी या गुन्ह्याबाबत संपूर्ण गुप्तता पाळली होती.
याप्रकरणी पुण्यातील डेक्कन, पिपंरी व पुणे ग्रामीण पोलिसांत ३ गुन्हे दाखल आहेत. याप्रकरणी 5 जणांना अटक केली आहे. तर इतर फरार आहेत. त्यांचा देखील शोध घेतला जात आहे.
पोलीस पथकाने टाकलेल्या धाडीत जवळपास एक ट्रक भरुन कागदपत्रे मिळाली आहेत. सध्या या कागदपत्रांची छाननी सध्या सुरु आहे. त्यात ठेवीदारांच्या पावत्या, कर्जदारांचे शपथपत्रे, अनेक बनावट शिक्के असे साहित्य आहे. त्यातील कोणते बँकेने केलेली दस्तऐवज आहेत व कोणते आरोपींनी बेकायदेशीरपणे लोकांकडून करुन घेतलेली कागदपत्रे आहेत, ही कागदपत्रे लिलावामधील आहेत की तारण म्हणून घेतलेली आहेत, याची तपासणी सुरु करण्यात आली आहे. त्यासाठी पुणे पोलिसांनी स्वतंत्र पथक तयार केले आहे. तसेच अटक केलेल्या आरोपीचे जबाब नोंदवून घेण्याचे कारण स्वतंत्र पथक करीत आहेत. दरम्यान या सर्व कागदपत्रांची छाननी करुन त्याचा पुरावा म्हणून वापर करण्याच्या दृष्टीने आणखी काही दिवस लागणार आहेत. पुणे पोलिसांनी केलेल्या या कारवाईने बीएचआर पतसंस्थेचे ठेवीदार, गुंतवणुकदार व ग्राहक यांच्याकडून जोरदार स्वागत केले जात आहे.
दोन पोलीस उपायुक्त, ४ सहायक पोलीस आयुक्त, २५ पोलीस निरीक्षक, २५ सहायक निरीक्षक आणि १०० पोलीस कर्मचारी असा पुणे, पिपंरी आणि ग्रामीण पोलिसांच्या या मोठ्या पथकाने जळगावमध्ये मागच्या शुक्रवारी सकाळीच जाऊन छापा घातला होता. त्यात जळगावमधील १२ ठिकाणी एकाचवेळी हे छापे घालण्यात आले. त्यातून मिळालेल्या माहितीवरुन इतर ठिकाणी तसेच औरंगाबाद येथे झडत्या घेण्यात आला.