निधी मी आणला पण… पंकजा मुंडेंनी नाव न घेता धनंजय मुंडेंवर साधलं शरसंधान

बीड : पोलीसनामा ऑनलाइन – बीड जिल्ह्यात मी निधी आणला त्याचे नारळ फोडण्याची संधी कोरोनामुळे या लोकांना मिळाली नाही. राष्ट्रवादीच्या प्रत्येक नेत्याचा केंद्र शासीत प्रदेश आहे. त्यामुळे ते कोणीही कोणाकडे जात नाहीत. कोणाचा कोणाला ताळमेळ नाही. आम्हाला या राष्ट्रवादीच्या उमेदवाराला पराभूत कारायचे आहे, असे म्हणत नाव न घेता भाजपा नेत्या आणि माजी मंत्री पंकजा मुंडे यांनी राष्ट्रवादीचे नेते आणि राज्याचे सामाजिक न्यायमंत्री धनंजय मुंडे यांच्यावर निशाणा साधला. हे सरकार पाच वर्षे टिकणार नाही, असे म्हणत त्यांनी महाविकास आघाडी सरकारवर सुद्धा टिका केली.

पंकजा मुंडे मराठवाडा पदवीधर मतदार संघ निवडणूकीतील भाजपाचे उमेदवार शिरीष बोराळकर यांच्या प्रचारासाठी बीड येथे आल्या होत्या. पदवीधर मतदार व कार्यकर्ता मेळाव्यात त्या बोलत होत्या. या मेळाव्याला आमदार भीमराव धोंडे, लक्ष्मण पवार, अक्षय मुंदडा, माजी आमदार आदिनाथ नवले, रमेश आडसकर, प्रवीण घुगे, राजेंद्र मस्के, युवा जिल्हा अध्यक्ष निळकंठ चाटे इत्यादींसह अनेक कार्यकर्ते उपस्थित होते.

पंकजा मुंडे पुढे म्हणाल्या की, मुंडे साहेबांचे राहिलेले स्वप्न पूर्ण करण्याची वेळ आहे. हा मतदार गोपीनाथ मुंडे यांच्यावर प्रेम करणारा आहे. त्यामुळे शिरीष बोराळकर अधिक मताधिक्याने विजयी होतील, असा विश्वास त्यांनी व्यक्त केला.

पंकजा मुंडे पुढे म्हणाल्या, या सरकारने जवळपास सर्वच निर्णय पूर्णत्वास नेले नाहीत. त्यामुळे तोंडात एक आणि ओठात एक अशी आमची प्रवृत्ती नाही. मला इतरांना गुलाल लावण्याची सवय आहे, म्हणून आपण शिरीश बोराळकरांना यावेळेस नकीच गुलाल लावू या, असे त्या म्हणाल्या.

You might also like