ताज्या बातम्यामहत्वाच्या बातम्या

चीनच्या दाव्यावर WHO चं ‘उत्तर’, म्हणाले – ‘फ्रोजन चिकनपासून ‘कोरोना’चा संसर्ग पसरण्याचा कोणताही पुरावा नाही’

coronavirus who file photo

नवी दिल्ली, वृत्तसंस्था : जागतिक आरोग्य संघटनेने चीनच्या त्या दाव्यास फेटाळून लावले आहे ज्यामध्ये त्यांनी ब्राझीलहून पाठवण्यात आलेल्या फ्रोजन चिकन विंग्समध्ये कोरोना आढळल्याचे म्हटले होते. डब्ल्यूएचओने म्हटले आहे की अद्याप पॅक्ड किंवा फ्रोजन फूडसाठी कोरोना संक्रमणाचा कोणताही पुरावा उपलब्ध नाही, म्हणून लोकांनी ते वापरण्यास घाबरू नये. चीनने गेल्या आठवड्यात दावा केला होता की यांताई शहरातील इक्वाडोरहून पाठविल्या गेलेल्या लॉबस्टर फिशमध्येही संसर्ग झाल्याचे आढळले आहे, परंतु अद्याप याबाबत स्पष्ट पुरावे समोर आलेले नाहीत.

डब्ल्यूएचओच्या आपत्कालीन कार्यक्रमाचे प्रमुख माईक रायन म्हणाले की लोकांना खाण्याचे पदार्थ मग ते पॅक्ड असो किंवा फ्रोजन याबद्दल सध्या तरी घाबरून जाण्याचे काही कारण नाही. फ्रोजन फूडमध्ये कोरोना विषाणू पसरत असल्याचा कोणताही पुरावा अद्याप आम्हाला मिळालेला नाही. लोकांनी याची चिंता करू नये. अन्न साखळीद्वारे व्हायरस संक्रमित झाल्याचा कोणताही पुरावा नाही, लोक या खाद्यपदार्थांचा आरामात वापर करू शकतात. डब्ल्यूएचओच्या साथीच्या रोग विशेषज्ञ मारिया व्हॅन केरखॉव्ह यांनी चीनच्या दाव्यावर विश्वास ठेवणे कठीण असल्याचे सांगितले. त्यांनी फ्रोजन फूडच्या हजारो पॅकेटची तपासणी केली आणि त्यापैकी केवळ 10 जणांना संसर्ग झाल्याचे आढळले, ही संख्या इतकी कमी आहे की त्याकडे लक्ष दिले जाऊ शकत नाही.

 

 

 

 

 

 

ब्राझीलने देखील म्हटले- चीनच्या दाव्यावर संशय

ब्राझीलच्या कृषी मंत्रालयानेही चीनच्या दाव्यावर शंका व्यक्त करत म्हटले आहे की या संदर्भात चीन सरकारकडून या दाव्याशी संबंधित स्पष्टीकरण आणि दाव्यांशी संबंधित पुरावे मागितले गेले आहेत. दुसरीकडे, इक्वाडोरचे प्रोडक्शन मंत्री इव्हान ऑन्टेनेडा म्हणाले की फ्रोजन अन्नाच्या बाबतीत आम्ही अत्यंत कठोर नियम आणि शिस्त पाळत आहोत. देश सोडल्यानंतर त्या उत्पादनांचे काय होते याची जबाबदारी आम्ही घेऊ शकत नाहीत.

 

 

 

 

 

दुसरीकडे चीनी माध्यमांनुसार, शेनझेनच्या स्थानिक रोग नियंत्रण केंद्राने (सीडीसी) नियमित तपासणी दरम्यान ब्राझीलहून पाठविलेल्या चिकनचा नमुना घेतला होता. तपासणी केल्यावर रिपोर्ट पॉझिटिव्ह आला. अधिकाऱ्यांनी गुरुवारी सांगितले की, संक्रमित चिकनच्या संपर्कात आलेल्या काही लोकांची आणि इतर उत्पादनांचीही चौकशी केली गेली होती, परंतु त्यांचा अहवाल निगेटिव्ह आला आहे. शेनझेन सीडीसीने इतर देशातील खाद्यपदार्थ खाण्याबाबत सावधगिरी बाळगण्याचा सल्ला दिला आहे. जूनमध्ये चीनची राजधानी बीजिंगच्या शिनफैडी सीफूड मार्केटमध्ये संसर्गाची प्रकरणे समोर आली होती. तेव्हापासून, सरकार सर्व खाद्यपदार्थाचे नमुने घेऊन त्यांची कोरोना चाचणी घेत आहे.