कंगनाला ‘टीवटीव’ पडली महागात, ‘100 रूपयांसाठी आंदोलन करणारी आजी’च्या ट्विटमुळं मानहानीचा खटला

पोलिसनामा ऑनलाईन टीम – ट्विटरवर वायफळ वक्तव्य करणं अभिनेत्री कंगना रणौत हिला चांगलेच महागात पडले आहे. तिने केलेले एक ट्विट आता तिच्या अडचणीत वाढ करणार आहे. आधीपासूनच कायदेशीर अडचणींच्या कचाट्यात अडकलेल्या कंगनाविरोधात आता बठिंडा (पंजाब) येथे मानहानीची तक्रार दाखल करण्यात आली आहे. ७३ वर्षीय मोहिंदर कौर यांनी ही तक्रार दाखल आहे. कंगना रणौतने शेतकरी आंदोलनाविरोधात मत मांडताना अनेक ट्विट्स केले होते. त्यावेळी कंगनाने मोहिंदर कौर यांची तुलना दिल्लीतील शाहीन बाग आंदोलनात सहभागी होणाऱ्या ९० वर्षीय बिलकीस दादीसोबत केली होती. त्या ट्विटमध्ये कंगनाने दावा केला होता की, त्या १०० रुपयांसाठी प्रत्येक आंदोलनात सहभागी होत असतात.

दरम्यान, पंजाबच्या ७३ वर्षीय कौर यांनी तक्रारीत म्हटलंय की, कंगना रणौतने ट्विटरवर त्यांचा उल्लेख शाहिन बागमधील दादीशी तुलना करुन चुकीचा आणि दिशाभूल करणारा दावा केला आहे. शुक्रवारी मोहिंदर कौर यांचे वकील रघबीर सिंग यांनी सांगितल्यानुसार, कंगनाविरोधात आयपीसीच्या कलम ४९९ (मानहानी) आणि ५०० (मानहानीची शिक्षा) अंतर्गत गुन्हा दाखल करण्यात आला आहे. ११ जानेवारी रोजी कोर्टात यावर सुनावणी होणार आहे.

मोहिंदर कौर पुढे बोलताना म्हणाल्या की, या प्रकारच्या टीपण्णीमुळे माझी प्रतिष्ठा आणि आत्मसन्मान खालावला गेला आहे. माझी प्रतिमा मलीन झाली आहे. चुकीच्या आणि निंदनीय ट्वीटमुळे, मला तसेच माझे कुटुंबीय, नातेवाईक, शेजारी आणि सहकारी लोकांना गंभीर मानसिक ताणतणावाला सामोरे जाऊन मानहानीचा त्रास सहन करावा लागला आहे. तसंच रणौत यांनी याबाबत साधी माफी देखील मागितली नाही.

कंगना रणौतने शेतकरी आंदोलनाबाबत भाष्य करताना ट्विटरवर म्हटलं होतं की, शाहिन बागच्या दादीने देखील शेतकऱ्यांच्या या आंदोलनात सहभाग नोंदवला आहे. कौर यांचा फोटो ट्विट करत तिने म्हटलं होतं की ही तिच दादी आहे जी १०० रुपयांसाठी कोणत्याही आंदोलनात उपलब्ध राहते. त्यानंतर या दोन्हीही महिला वेगळ्या आहेत हे समजल्यानंतर कंगनाने ते ट्विट डिलीट केलं होतं. कंगनाने कौर यांचा उल्लेख बिल्कीस बानो असा केला होता. सुधारित नागरिकत्व कायद्याविरोधात दिल्लीच्या शाहिनबागमधील आंदोलनाच्या आयकॉन बनलेल्या बिल्कीस बानो या मध्यंतरी चर्चेत आल्या होत्या. टाइम मॅगझीनने जगातील प्रभावशाली १०० महिलांमध्ये त्यांचा समावेश केला होता.