बोरूबहाद्दरांची ‘फ्रायडे नाईट’ जोरदार रंगली असावी, शिवसेनेच्या टीकेला ‘मनसे’कडून ‘टोकदार’ उत्तर

मुंबई : पोलीसनामा ऑनलाईन – राज्यातील घटत्या महसूलाचा विचार करता वाईन शॉप सुरु करण्यास हरकत काय? अशी सूचना मनसे प्रमुख राज ठाकरेंनी मुख्यमंत्री उद्धव ठाकरेंना पत्र लिहून केली होती. राज ठाकरेंच्या या सूचनेचा शिवसेनेच्या सामना अग्रलेखातून खोचक समाचार घेण्यात आला होता. त्याला मनसेनेही जोरदार प्रत्युत्तर दिलं आहे. त्यामुळे राज्यात एकीकडे कोरोना तर दुसरीकडे राजकरण तापलं आहे. मनसे चित्रपट सेनेचे अध्यक्ष अमेय खोपकर यांनी सामनाचे कार्यकारी संपादक आणि शिवसेना नेते संजय राऊत यांच्यावर निशाणा साधला आहे.

काय आहे खोपकर यांच्या पोस्टचा मजकूर ?

त्यांनी म्हटलं आहे की, मैं किस पथ से जाऊँ? असमंजस हैं भोलाभाला.खूप दिवस झाले. हल्ली कुणीच विचारत नाही मला अशा शब्दात ‘मधुशाला’ मधली ही ओळ खास बोल बच्चन राऊतसाठी आहे. नागू सयाजी वाडीत बसून शब्दांचे बुडबुडे काढणारे संजय राऊत हे सध्या आपल्याकडे कुणीच लक्ष देत नाही या भावनेने पछाडलेले दिसतात. अन्यथा राज ठाकरेंनी केलेली सूचना त्यांच्या कार्यकारी टाळक्यात शिरली असती. वेळ काय आणि यांचं चाललंय काय? डाईन, वाईन वगैरे शब्दांचे खेळ करत लॉकडाऊनमध्ये वेळ बरा जाण्यापलिकडे फार काही निष्पन्न होणार नाही असा टोला त्यांनी लगावला आहे.

त्याचसोबत राज ठाकरेंनी जी सूचना केली ती ताकाला जाऊन भांडे न लपवता केली आहे. सरकारी तिजोरीत खडखडाट असताना आता नैतिकतेच्या मायाजालात न अडकता वैधानिक मार्गाने काही उपाय अवलंबण्याची आवश्यकता आहे. त्यात तळी उचलून धरण्याचा प्रश्न कुठे येतो? आणि केवळ दारूच नव्हे, तर उपाहारगृहे आणि अन्य व्यवहारदेखील सुरू करण्याचीही सूचना केली, हे या रडत राऊतांच्या रिकाम्या डोक्यात शिरलेले दिसत नाही. त्यामुळेच मनसेच्या विधायक सूचनेची खिल्ली उडवण्याचा विचार आला असावा असंही अमेय खोपकर म्हणाले.

दरम्यान, तुमचे संकटमोचक अजित पवारांनीही हीच मागणी करणारे पत्र देशाच्या प्रधानमंत्र्यांना लिहिले आहे. आरोग्यमंत्री राजेश टोपे यांनीही असेच विधान काही दिवसांपूर्वी केले होते. तेव्हा त्यांची खिल्ली उडवण्याची हिंमत या बोरूबहाद्दराला झाली नाही, की मालकांची भीती वाटली? बोरूबहाद्दरांची ‘फ्रायडे नाईट’ जोरदार रंगली असावी, आणि त्याच हॅगओव्हरमध्ये राज ठाकरेंच्या पत्रातले सविस्तर मुद्दे बुडाले. की जे राज ठाकरेंना सुचलं ते आपल्याला आधी का सुचलं नाही, या दु:खाच्या बेहोषीत ‘डाईन, वाईन.’ वगैरे शब्दांचे खेळ कागदावर सांडले? अशा शब्दात अमेय खोपकर यांनी संजय राऊत यांची खिल्ली उडवली आहे.