नागपूर : पोलीसनामा ऑनलाईन – पुणे, मुंबई नंतर आता राज्यातल्या इतर शहरात ,छोट्या, गावांमध्येही कोरोनाचा संसर्ग वाढू लागलाय. राज्याची उपराजधानी असणाऱ्या नागपुरातही शुक्रवारी २ रुग्ण नव्याने वाढल्याने हा आकडा १०० वर पोहचला आहे. त्यामुळे आता नागपूरकरांना देखील अधिक सतर्कता बाळगण्याची गरज आहे.
नव्याने लागण झालेल्यांमध्ये एका महिला आणि पुरुषाचा समावेश
दरम्यान , करोनाची लागण झाल्याचे शुक्रवारी स्पष्ट झालेल्यांमध्ये ५२ वर्षीय पुरुष आणि ५० वर्षीय महिलेचा समावेश आहे. राष्ट्रीय पर्यावरण अभियांत्रिकी संस्थेने (निरी) तपासलेल्या घशातील स्त्रावाच्या नमुन्यांमध्ये महिलेचा अहवाल पॉझिटिव्ह आला. तर दुसरा नमुना अखिल भारतीय आयुर्विज्ञान संस्थेच्या (एम्स) विषाणू प्रयोगाशाळेत पॉझिटिव्ह आला. त्यामुळे नागपुरातील करोनाबाधितांचा आकडा आता १०० वर पोचला आहे.
कोरोनाबाधितांच्या संख्येत सातत्याने वाढ
सातत्याने पॉझिटिव्ह रुग्ण आढळत असलेल्या नागपुरात ८४ रुग्णांची नोंद ही गेल्या फक्त ३ आठवड्यांध्ये नोंदविली गेली आहे. एप्रिल महिना सुरू होण्यापूर्वी शहरातील करोनाबाधितांचा आकडा हा जेमतेम १६ वर स्थिरावला होता. सतरंजीपूरा येथील करोनाबाधित रुग्ण इंदिरा गांधी शासकीय वैद्यकीय महाविद्यालय व रुग्णालयात उपचाराला आल्यानंतर ही साखळी एकामागे एक उकलत गेली. त्यानंतर सातत्याने पॉझिटिव्ह आढळत असलेल्या करोनाबाधित रुग्णांचा आकडा आता शतकाच्या टप्प्यावर येऊन पोचला आहे.
नागपूरातील आकडेवारी
दैनिक संशयित : २२३
एकूण संशयित : १२९८
सध्या भरती संशयित : १०२
एकूण भरती संशयित : १३३६
एकूण भरती पॉझिटिव्ह रुग्ण- ८२
दैनिक तपासणी नमुने: ७७
एकूण तपासणी नमुने: १८४३
आतापर्यंत पॉझिटिव्ह नमुने: १००
घरी सोडलेले सकारात्मक रुग्ण : १५
घरी सोडलेले संशयित : १२३३
आज अलगीकरण केलेले संशयित: १७७
अलगीकरण कक्षात भरती संशयित- ६९४
अलगीकरण कक्षातून घरी पाठविलेले संशयित- ०८
अलगीकरण कक्षातून रुग्णालयात पाठविलेले संशयित- ०२
पाठपुरावा सुरु असलेले एकूण संशयित- ५०२