Oxford Coronavirus Vaccine : कायदा बदलून ब्रिटननं दिली मंजूरी, शेवटच्या टप्प्यात परीक्षण
file photoनवी दिल्ली : वृत्तसंस्था – ब्रिटनच्या ऑक्सफोर्ड विद्यापीठात कोरोना लसीची अंतिम टप्प्याची चाचणी सुरू आहे. याच दरम्यान ब्रिटन कायद्यात बदल करण्याची तयारी करीत आहे जेणेकरुन अल्पावधीत कोरोना लस मंजूर होईल. शास्त्रज्ञांनी लसीच्या यशाची पुष्टी करताच ब्रिटन हे लोकांना उपलब्ध करून देण्याचा प्रयत्न करीत आहे. लस यशस्वी झाल्यानंतर सामान्यत: परवाना मिळविण्यासाठी कित्येक महिने लागून जातात. ब्रिटन सरकारने म्हटले आहे की ही लस सुरक्षा चाचणी उत्तीर्ण झाल्यास तात्काळ तात्पुरती मंजुरी दिली जाईल.
ब्रिटनचे उपमुख्य वैद्यकीय अधिकारी जोनाथन व्हॅन टॅम म्हणाले की आम्ही जर प्रभावी लस तयार केली तर ती लवकरात लवकर रूग्णांना उपलब्ध करुन देणे आवश्यक आहे. तथापि, जेव्हा आम्ही कठोर सुरक्षा मानके पूर्ण करू शकू तेव्हाच हे होईल. यापूर्वी ऑक्सफोर्ड लसीकरण समूहाचे एक अधिकारी अ‍ॅन्ड्र्यू पोलार्ड यांनी सांगितले की यावर्षी ही लस मंजूर होण्यासाठी नियामकांना चाचणी डेटा पाठविला जाईल अशी अपेक्षा आहे.
ऑक्सफोर्ड विद्यापीठाच्या कोरोना लसीची चाचणी अनेक देशांमध्ये होत आहे. ब्रिटन, ब्राझील आणि दक्षिण आफ्रिकेत सुमारे 20 हजार लोकांवर लस चाचण्या घेतल्या जात आहेत. त्याचवेळी ऑक्सफोर्डशी संबंधित अ‍ॅस्ट्राझेनेका ही कंपनी अमेरिकेत 30 हजार लोकांवर चाचणीचे नेतृत्व करीत आहे. सीरम इंस्टीट्यूटनेही या लसीची चाचणी भारतात सुरू केली आहे.