‘कनेक्टिंग ट्रस्ट’च्या माध्यामातून विनामूल्य हेल्पलाईनद्वारे समुपदेशन; आत्महत्या करावीशी वाटतेय तर मग थांबा, इथे फक्त एक कॉल करा

मुंबई : पोलीसनामा ऑनलाइन –   कोरोना संपूर्ण जगभरात पसरला आहे. दिवसेंदिवस कोरोनाबाधितांची आकडेवारी वाढतच आहे. गेल्यावर्षी कोरोनामुळे अनेकांच्या नोकऱ्या गेल्या. मोठ्या प्रमाणत बेरोजगारी निर्माण झाली तसंच व्यवसायात अपयश आले. लोकांवर आत्महत्याची वेळ आली. या सर्वातून खचलेल्या मनांना उभारी द्यायचे काम ‘कनेक्टिंग ट्रस्ट’ च्या माध्यामातून होते आहे. विनामूल्य हेल्पलाईनद्वारे समुपदेशन करून अशा व्यक्तींवर उपचार होतात.

आत्महत्या रोखण्याच्या उद्देशाने अर्णवाझ दमानिया यांनी पुण्यात सन २००५ मध्ये ‘कनेक्टिंग ट्रस्ट’ ही स्वयंसेवी संस्था स्थापन केली. या संस्थेतील समुपदेशक दूरध्वनी संवादाच्या माध्यमातून तणावग्रस्तांचे मन हलके करतात. पुणे पोलीस, ससून जनरल हॉस्पिटल यांच्या सहकार्याने ‘सुसाईड सर्वायव्हर सपोर्ट प्रोग्राम’ राबविला जात आहे. लॉकडाऊन कालावधीत व्यथा मांडणाऱ्या ईमेलची संख्या १५ ते ४५, तर कॉलची संख्या १६० च्या पुढे असल्याची माहिती संस्थेकडून देण्यात आली. आत्महत्येचा विचार करणाऱ्यांमध्ये युवकांचे प्रमाण अधिक झाले असल्याचेही संस्थेतील समुपदेशकांचे निरीक्षण आहे.

पुण्यातून सुरु झालेले हे काम दिल्ली, हरियाणा, औरंगाबाद, नागपूर, हिंगणघाट, पनवेल या ठिकाणीही सुरू आहे. ‘कनेक्टिंग ट्रस्ट’चे सीईओ लियान सातारावाला याचे नियोजन करतात. ९९२२००४३०५, ९९२२००११२२ हे हेल्पलाईनचे क्रमांक असून रोज सकाळी १२ ते रात्री ८ या वेळेत कधीही फोन करा, फोन करणाऱ्याचे नाव, सर्व माहिती गुप्त ठेवली जाते,असे संस्थेच्या वतीने सांगण्यात आले.