नवी दिल्ली : वृत्तसंस्था – भारतात अल्पसंख्याकांना समानतेची वागणूक दिली जात नाही असे म्हणणाऱ्या पाकिस्तानचे पंतप्रधान इम्रान खान यांना भारताचा माजी क्रिकेटपटू मोहम्मद कैफने चांगलेच सुनावले आहे. अल्पसंख्याकांच्या बाबतीत इम्रान यांनी जादा लेक्चर देऊ नये, असं कैफने सुनावलं आहे.
काय म्हणाला मोहम्मद कैफ
मोहम्मद कैफने ट्विट करून इम्रान खान यांच्यावर टीका केली आहे. ‘फाळणीनंतर पाकिस्तानमध्ये अल्पसंख्याक २० टक्के होते. आता पाकमध्ये केवळ दोन टक्केच अल्पसंख्याक आहेत. दुसरीकडे भारतात स्वातंत्र्यानंतर अल्पसंख्याकांची संख्या वाढली आहे. त्यामुळे मला वाटतं अल्पसंख्याकांना कशी वागणूक देतात यावर लेक्चर देणारा पाकिस्तान हा शेवटचा देश असेल, असा टोला कैफने इम्रान यांना लगावला आहे.
प्रसिद्ध अभिनेते नसिरुद्दीन शहा यांनी भारतीय समाज मनात विष पेरलं जात असल्याचं सांगत मला माझ्या मुलांच्या सुरक्षेची काळजी वाटतेय, असं म्हटलं होतं. त्यावर इम्रान यांनी भारतात अल्पसंख्याकांना समानतेची वागणूक दिली जात नसल्याची टीका केली होती. त्यावर नसिरुद्दीन शहा यांनी इम्रान यांना चोख प्रत्युत्तर दिले होते.