फडणवीस जे बोलले ते त्यांनी करून दाखवले, दरेकरांनी केले ‘कौतुक’

मुंबई : पोलीसनामा ऑनलाइन – “बहुसंख्य राजकीय नेते कोरोना झाल्यावर पंचातारांकित रुग्णालयात उपचार घेत असतानाच फडणवीस यांनी सेंट जॉर्ज या सरकारी रुग्णालयात उपचार घेणे पसंत केले. त्यांनी बोललेले करून दाखवले, त्यांनी सरकारी यंत्रणेवर विश्वास दाखविला आहे,” असे विधान परिषदेतील विरोधी पक्षनेते प्रवीण दरेकर यांनी आज येथे सांगितले.

कोरोना झाल्यावर पंचतारांकित रुग्णालयांकडे पाठ फिरवून देवेंद्र फडणवीस यांनी सरकारी रुग्णालयातच उपचार घेतले, असे करून त्यांनी एकप्रकारे सरकारी यंत्रणेवर विश्वास दाखविला, त्यांनी बोललेले करून दाखविले, असे गैारवउद्धगार दरेकर यांनी काढले.

देवेंद्र फडणवीस यांची कोरोनाकाळातील तसेच एकंदर कामे यांचा समावेश असलेल्या जनसेवक विशेषांकाचे प्रकाशन आज दरेकर यांच्या हस्ते व भाजपा महाराष्ट्राचे उपाध्यक्ष तसेच जनसेवक विशेषांकाचे अतिथी संपादक माधव भांडारी यांच्या प्रमुख उपस्थितीत झाले.

फडणवीस यांनी प्रत्येक संकटप्रसंगात जनतेमध्ये प्रत्यक्ष फिरून त्यांच्या अडीअडचणी समजावून घेऊन त्यांना न्याय मिळवून दिला. त्यामुळे फडणवीस हे देखील खऱ्या अर्थाने कोविडयोद्धे आणि जनसेवक आहेत. फडणवीस यांच्या सामाजिक कार्याची नोंद घेऊन प्रकाशित करण्यात आलेला ‘जनसेवक’हा विशेषांक पुढच्या पिढीला नक्कीच प्रेरणादायी ठरेल, असा विश्वासही दरेकर यांनी व्यक्त केला.

फडणवीस यांनी अविरत परिश्रम करून राज्यातील जनतेला धीर दिला. त्यांच्या या सामाजिक कार्याची नोंद घेणारा हा विशेषांक म्हणजे एका अर्थाने जनतेच्यावतीने त्यांच्या योगादनाप्रति व्यक्त केलेली कृतज्ञता आहे, असेही दरेकर म्हणाले.

You might also like