‘प्रायव्हेट पॉलिसी’मुळं गोपनीयतेवर परिणाम होत असेल तर ‘डिलीट’ करा WhatsApp, दिल्ली HC नं सांगितलं
नवी दिल्ली : वृत्तसंस्था – व्हॉट्सअॅप (Whatsapp) च्या प्रायव्हेट पॉलिसी संदर्भात आज दिल्ली उच्च न्यायालयात (Delhi High Court) सुनावणी झाली. सुनावणीदरम्यान याचिकाकर्त्याने अपील केले आणि म्हटले की व्हॉट्सअॅपच्या नवीन प्रायव्हेट पॉलिसी (Private Policy) ने गोपनीयता भंग होते, म्हणून सरकारने यावर लवकरात लवकर कारवाई केली पाहिजे. याचिकाकर्त्याची मागणी ऐकल्यानंतर दिल्ली हायकोर्टाने कठोर प्रतिक्रिया व्यक्त केली की, हे एक खाजगी अॅप आहे, जर आपल्या गोपनीयतेवर परिणाम होत असेल तर आपण व्हॉट्सअॅप बंद करा. हायकोर्टाने यासंदर्भात कोणतीही नोटीस बजावली नाही आणि म्हटले की, यावर सविस्तर सुनावणी करण्याची आवश्यकता आहे. आता या खटल्याची सुनावणी 25 जानेवारी रोजी होईल.
याचिकाकर्त्याच्या वतीने कोर्टात असे म्हटले गेले की व्हॉट्सअॅप जी नवीन प्रायव्हेट पॉलिसी आणत आहे त्यावर सरकारने कठोर कारवाई केली पाहिजे कारण ते लोकांच्या गोपनीयतेचे उल्लंघन आहे. याचिकाकर्त्याने म्हटले आहे की प्रायव्हेट पॉलिसीच्या माध्यमातून प्रायव्हेट अॅपला सर्वसामान्यांशी संबंधित वैयक्तिक माहिती सामायिक करायची आहे, ती त्वरित थांबविणे आवश्यक आहे.
यावर दिल्ली उच्च न्यायालयाने कठोर भाष्य केले. कोर्टाने म्हटले आहे की, जर या पॉलिसीचा तुमच्या गोपनीयतेवर परिणाम होत असेल तर व्हॉट्सअॅप डिलीट करा. हे एक खाजगी अॅप आहे, वापरकर्त्याने ते ठेवावे की नाही हे त्याने ठरवावे. कोर्टाने सांगितले की तुम्ही नकाशा किंवा ब्राउझर वापरता ? त्यात देखील आपला डेटा शेअर केला जातो.
दिल्ली हायकोर्टाच्या कठोर टीका ऐकल्यानंतर याचिकाकर्ते म्हणाले, “आम्हाला या प्रकरणात कठोर कायदा व्हावा अशी इच्छा आहे.” याचिकाकर्त्याने म्हटले, “युरोपियन देशांमध्ये यासंबंधित कठोर कायदे आहेत, त्यामुळे तेथे व्हॉट्सअॅपची पॉलिसी वेगळी आहे. भारतात यासंदर्भात कडक कायदा नसल्यामुळे सामान्य लोकांचा डेटा थर्ड पार्टीला विकला जात आहे.”