भिडेंची पिलावळ आवरा, अन्यथा महाराष्ट्र पेटेल : धनंजय मुंडे

राष्ट्रवादी काँग्रेसचे ज्येष्ठ नेते छगन भुजबळ यांना रविवारी जिवे मारण्याची धमकी असलेले एक पत्र मिळाले. मनोहर भिडे आणि मनुस्मृती विरोधात बोलाल तर, तुमचाही दाभोळकर आणि पानसरे करु, अशी धमकी या पत्रात देण्यात आली आहे. यावर धनंजय मुंडे यांनी ही संतप्त प्रतिक्रिया ट्वीटरवरून व्यक्त केली. शिवाय भुजबळांना आलेले पत्रही त्यांनी पोस्ट केले आहे.

ट्वीटरवरील आपल्या संतप्त प्रतिक्रियेत मुंडे यांनी म्हटले आहे की, मुख्यमंत्री महोदय, राज्यात हे काय चालले आहे? मनोहर भिडे आणि त्याची पिलावळ पुरोगामी विचारांच्या प्रत्येकाचा पानसरे, दाभोलकर करायला निघाली आहे. छगन भुजबळ साहेबांच्या केसालाही धक्का लागला तर महाराष्ट्र पेटून उठेल , या पिलावळीला वेळीच आवर घाला, असा इशाराही मुंडेनी आपल्या ट्वीट करून दिला आहे. भुजबळांना आलेल्या धमकीपत्रानंतर महाराष्ट्राचे राजकीय वातावरण तापले आहे. राष्ट्रवादीमधून या प्रकारानंतर संतप्त प्रतिक्रिया उमटत आहेत.