पेन्शन योजनेपासून शिक्षकांना ‘वंचित’ ठेवण्याचा डाव

अहमदनगर : पोलीसनामा ऑनलाइन – शिक्षकांना २००५ पूर्वीची पेन्शन योजना लागू करावी, ही मागणी सर्व कर्मचाऱ्यांची आहे. सरकारकडे वेळोवेळी आपण सातत्याने पाठपुरावा केला आहे. मात्र, सरकारकडून फक्त आश्वासन देण्यात आले. या योजनेपासून सर्वांना वंचित ठेवण्याचा सरकारचा डाव आहे, असा आरोप नाशिक पदवीधर मतदारसंघाचे आमदार डॉ. सुधीर तांबे यांनी केला आहे.

पेन्शन योजनेबाबत दिलेल्या प्रसिद्धीपत्रकात डॉ. तांबे यांनी म्हटले आहे की, सर्व कर्मचाऱ्यांना २००५ पूर्वीची पेन्शन योजना लागू करावी, ही आमची जुनी मागणी आहे. २००५ पूर्वी सेवेत असलेल्या परंतू २००९ नंतर शंभर टक्के अनुदानास पात्र झालेल्या सर्व शिक्षकांना जुनी पेन्शन योजना लागू करणे, हे न्याय्य व सरकारच्या प्रचलित धोरणास अनुसरून आहे. पेन्शन योजनेबाबत विधान परिषदेत अनेकवेळा आवाज उठविला आहे. शिक्षण आयुक्तांसमोरही आंदोलने केली आहेत. परंतू सरकार हा प्रश्‍न जाणून बुजून प्रलंबित ठेवत आहे.