वैद्यकीय परीक्षांबाबतची अनिश्चितता दूर करा, मंत्री अमित देशमुख यांची सूचना

पोलीसनामा ऑनलाइन टीम – कोरोनामुळे वैद्यकीय शिक्षण घेणार्‍या विद्यार्थ्यांच्या परीक्षांबाबत सध्याच्या परिस्थितीत संभ्रम निर्माण झाला आहे. आरोग्य विज्ञान विद्यापीठाने याबाबत तातडीने निर्णय घेऊन ही अनिश्चितता दूर करावी, अशी सूचना वैद्यकीय शिक्षण मंत्री अमित विलासराव देशमुख यांनी महाराष्ट्र आरोग्य विज्ञान विद्यापीठाचे कुलगुरू डॉक्टर दिलीप म्हैसेकर यांना दिली आहे.

आरोग्य विज्ञान विद्यापीठामार्फत राज्यातील वैद्यकीय शिक्षण घेणार्‍या विद्यार्थ्यांच्या परीक्षा घेण्यात येतात. यामध्ये मेडिकल, आयुर्वेदिक, होमिओपॅथिक, युनानी त्याचप्रमाणे नर्सिंग परीक्षांचाही समावेश आहे. मात्र सध्याच्या लॉकडाऊनच्या परिस्थितीत वैद्यकीय शिक्षण घेणारे विद्यार्थी आणि पालक यांना परीक्षांबाबत आरोग्य विज्ञान विद्यापीठ काय निर्णय घेणार याबद्दल कमालीची उत्कंठा निर्माण झाली आहे. त्यामुळे विद्यापीठाने स्पष्ट भूमिका घेऊन याबाबतची अनिश्चितता तातडीने दूर करावी, अशी अपेक्षाही वैद्यकीय शिक्षण मंत्र्यांनी व्यक्त केली आहे.

वैद्यकीय विद्यार्थ्यांच्या परीक्षांबाबतचा निर्णय राष्ट्रीय स्तरावर असणार्‍या केंद्रीय परिषदांवर अवलंबून असतो, हे खरे असले तरीही या संस्थांशी तातडीने विचारविनिमय करून परीक्षांबाबतची भूमिका स्पष्ट करावी, अशा सूचना वैद्यकीय शिक्षण मंत्री अमित विलासराव देशमुख यांनी दिल्या आहेत.

पोलीसनामा न्युज आता टेलीग्रामवर... आमचं चॅनेल (@policenamanews) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.
WhatsAPP
You might also like