‘या’ कंपनीच्या कर्मचार्‍यांसाठी मे 2021 पर्यंत ‘वर्क फ्रॉम होम’

पोलीसनामा ऑनलाइन : कोरोना भारतात येऊन जवळजवळ वर्ष होईल. तरीही कोरोना काही कमी झालेला नाही. उलट त्याचा प्रादुर्भाव अजूनच वाढत चालला आहे. दरम्यान, कोरोनावरील लस पुढील एक-दोन महिन्यात उपलब्ध होईल, असं ही बोललं जात आहे. कोरोनाचे आगामी काळात संकट कमी होईल, अशी आशा सर्वांनी वाटत असेल. मात्र, अद्यापही कोरोनाबाबत सावधानता बाळगली पाहिजे. कोरोनाच्या संसर्गामुळे काही कंपन्यांनी अद्यापही ‘वर्क फ्रॉम होम’ सुरुच ठेवले आहे.

फ्लिपकार्टच्या एका अधिकाऱ्याने म्हटले आहे, की “गेल्या अनेक महिन्यांपासून आम्ही पूर्णपणे काम करताना, सहकार्य करताना आणि आशावादी राहण्यासाठी नवीन पद्धतींचा अवलंब करताना या काळात कोरोनाशी लढण्यासाठी खूप लवचिकता दाखवली आहे. कर्मचाऱ्यांच्या सकारत्मकतेसाठी लीडरशीप टीमला खूप अभिमान वाटत आहे.” आता ई-कॉमर्स कंपनी फ्लिपकार्टने आपल्या १२ हजार कर्मचार्‍यांना घरून काम करण्यासाठी मुदतवाढ दिली आहे. आता हे कर्मचारी ३१ मे २०२१ पर्यंत ‘वर्क फ्रॉम होम’ पॉलिसीअंतर्गत घरातूनच काम करणार आहेत. फ्लिपकार्टने आपला ‘बँक टू ऑफिस प्लॅन’ चा दुसरा टप्पा पुढील वर्षी मे पर्यंत थांबवला आहे. काही दिवसांपूर्वी अ‍ॅमेझॉनने देखील त्यांच्या कर्मचाऱ्यांसाठी ‘वर्क फ्रॉम होम’चा कालावधी जून २०२१ पर्यंत वाढवला होता.

दरम्यान बिझनेस स्टँडर्डने आपल्या एका रिपोर्टमध्ये दिलेल्या माहितीनुसार, फ्लिपकार्टनं अशा कर्मचाऱ्यांना ऑफिसमध्ये बोलावण चालू ठेवलं आहे, ज्यांना रोस्टर बेसिसवर आधीपासूनच ऑफिसमधून काम करावं लागत आहे. तर इतर सर्व कर्मचारी घरातून काम करतील. तसेच, ऑफिसमध्ये येणाऱ्या कर्मचाऱ्यांना गाइडलाइन आणि प्रोटोकॉलचे पालन करावे लागेल, असे कंपनीनं स्पष्ट केलं आहे. तसंच, “आम्ही लवकरात लवकर एकमेकांना भेटू इच्छित आहोत. मात्र, सध्याची परिस्थिती पाहता येणाऱ्या काळात याची आशा दिसत नाही आहे. स्वत:ला आणि कुटुंबाला सुरक्षित ठेवण्यासाठी सोशल डिस्टंसिंग आणि अन्य नियमांचं पालन करणे योग्य असेल.” फ्लिपकार्टचे चीफ पीपल्स ऑफिसर कृष्णा राघवन यांनी कर्मचाऱ्यांना पाठवलेल्या एका मेलमध्ये म्हटलं आहे.

कोव्हिड लीव्ह पॉलिसी

फ्लिपकार्टने वर्क फ्रॉम होमला प्रोत्साहन देण्याव्यतिरिक्त ‘Covid Care Leaves’ ची देखील घोषणा केली आहे. जर एखादा कर्मचारी कोरोना पॉझिटिव्ह आढळला आला तर या योजनेअंतर्गत कर्मचाऱ्यांना २८ दिवसांची सुट्टी देखील मिळेल. ही सुट्टी पेड लीव्ह स्वरुपात असणार आहे. या सुट्टीचे पैसे कापले जाणार नाहीत.