वर्धा : पोलीसनामा ऑनलाईन – बँकेकडून अनेकदा सूचना केल्या जातात तुमच्या खात्याविषयी तसेच डेबीट किंवा क्रेडिट कार्ड विषयी माहिती कोणालाही देऊ नका. कारण यातून फसवणुकीचे अनेक प्रकार समोर येतात. अशीच एक घडली आहे. चोरट्यांनी वर्ध्याच्या रमणा इथल्या विठ्ठल सोमनाथे यांच्याकडून एसबीआय क्रेडिट कार्डसाठी जुजबी माहिती घेतली. यानंतर चोरट्यांनी मात्र त्यांच्या बँक खात्यावर डल्ला मारत खात्यातील दोन लाख पाच हजार रुपये लंपास केले. यानंतर सोमनाथे यांनी तात्काळ पोलिसात धाव घेत याबाबत तक्रार केली. यानंतर सायबर सेलने त्वरीत कारवाई केली. उल्लेखनीय बाब म्हणजे सायबर सेलने सोमनाथे यांना त्यांचे पैसे परत मिळवून दिले.
विठ्ठल सोमनाथे हे रमणा इथले शेतकरी आहेत. साधारण महिन्याभरपूर्वी त्यांनी स्टेट बँक आॅफ इंडियाचे क्रेडिट कार्ड घेतले होते. यानंतर साेमनाथे यांना एक फोन आला. समोरच्या व्यक्तीने सोमनाथे यांना क्रेडिट कार्डमधून बोलत असल्याचे सांगितले. यानंतर त्याने त्यांच्याकडून कार्डविषयी इतर माहिती घेतली. बोलता बोलता त्या व्यक्तीने आेटीपी (वन टाईम पासवर्ड) मिळवला. यानंतर चोरट्यांनी थेट त्यांच्या खात्यातून दोन लाख पाच हजार रुपयांचे तीन व्यवहार करत त्यांच्या खात्यातील पैशावर डल्ला मारला.
आपली फसवणूक झाल्याचे सोमनाथे यांच्या लक्षात येताच त्यांनी सायबर सेलशी संपर्क करत झालेल्या फसवणुकीची माहिती दिली. यानंतर सायबर सेलने तात्काळ शोध घेण्यास सुरुवात केली. त्यांनी सर्व तांत्रिक कार्यकुशलता पणाला लावली. अखेर सायबर सेलने सोमनाथे यांचे 2 लाख 5 हजार रुपये परत मिळवले. त्यामुळे फसवणूक झालेले सोमनाथे आर्थिक नुकसानीपासून थोडक्यात वाचले. त्यांनी यानंतर पोलिसांचे आभार मानले.
आर्थिक फसवणूक झालेल्या तक्रारींचा विचार करता गेल्या वर्षभरात तब्बल 9 लाख रुपये परत मिळवण्यात सायबर सेलला यश मिळाले आहे. जर तुम्हाला अशा आर्थिक फसवणुकीपासून दूर राहायचे असेल तर तुम्हाला थोडे जागरूक राहणे गरजेचे आहे. तुम्ही तुमचा आेटीपी किंवा बँक खात्यासंदर्भातील इतर तपशील कोणालाही शेअर करता कामा नये.
लुटारुंचे फसवणुकीचे फंडे व्यक्तीप्रमाणे वेगवेगळे
समोर आलेल्या माहितीनुसार, अशा प्रकारे फसवणूक करणाऱ्या लुटारू टोळ्या व्यक्ती आणि वयाप्रमाणे त्यांचे फसवणुकीचे फंडे बदलतात. पेन्शनचे, वयाचे व्हेरिफिकेशन आहे. नोकरिकरिता रेज्युमे शॉर्टलिस्ट झाला आहे, कोणत्याही ब्रँडची फ्रेन्चायजी द्यायची आहे. शॉपिंगच्या किंवा कॉस्मेटिकच्या ऑफर, शेतात मोबाईल टॉवर लावायचे आहे. तसेच आधार कार्ड व्हेरिफिकेशन करायचे आहे, अशी सर्वसाधारण पद्धत वापरली जात आहे.