दुबईहून चप्पलमध्ये 12 लाखांचं सोनं लपवून आणत होता हसन अली; कस्टम अधिकाऱ्यानं त्याला असं पकडलं

चेन्नई : वृत्तसंस्था – अधिकाऱ्यांची नजर चुकवण्यासाठी तस्करांनी तस्करीचे नवीन मार्ग शोधले आहेत, म्हणूनच तस्कर हे विचित्र ठिकाणी वस्तू लपवतात, परंतु शेवटी ते पकडले जातात. चेन्नई विमानतळावर असेच एक उदाहरण समोर आले आहे जेथे एक प्रवासी चप्पलमध्ये सोनं लपवून आणत होता, परंतु अधिकाऱ्यांच्या नजरेतून तो सुटू शकला नाही.

विमानतळावरील कस्टम अधिका-यांनी दुबई येथील हसन अली नावाच्या व्यक्तीच्या चप्पलमधून 12 लाख रुपयांचे सोने जप्त केले आहे. अहवालानुसार हसन विमानतळावरून बाहेर पडणार होता जेव्हा त्याची चप्पल पायातून निघाली, तेव्हा एका अधिकाऱ्याने त्याच्या मदतीसाठी त्याची चप्पल उचलली. पण त्याला चप्पलचे वजन जास्त असल्याचा संशय आला.

यानंतर अधिकाऱ्याने प्रवाशाला मदत करण्यासाठी चप्पल उंचावताच त्यात लपविलेले सोने चप्पलमधून बाहेर आले. रामनाथपुरम येथे राहणारा 23 वर्षीय मोहम्मद हसन अली दुबईहून आला होता आणि चप्पल काढून तो बाहेर जात होता. त्यानंतर, चेन्नई विमानतळावरील कस्टम अधिकाऱ्याने हसनला मदत करण्यासाठी चप्पल उचलली, पण चप्पल जड वाटली म्हणून त्यांनी त्यात पाहिले असता त्यात सोने होते.

चप्पलमध्ये सोन्याची चार पाकिटे लपवलेली होती
प्रत्येक चप्पलमधून प्रत्येकी 292 ग्रॅम वजनाचे दोन सोन्याची पाकिटे जप्त करण्यात आली आहेत. 24 कॅरट शुद्धतेसह 239 ग्रॅम सोन्याची किंमत 12 लाख रुपये असल्याचे तपासात निष्पन्न झाले आहे, जे सीमाशुल्क कायद्यांतर्गत वसूल केले गेले आहे आणि आरोपीला ताब्यात घेण्यात आले आहे.