गुप्तचर संघटनेने दहशतवादी हल्ल्याबाबत माहिती दिल्यानंतर रेल्वे मंडळाचे अध्यक्ष विनोद कुमार यादव यांनी रेल्वे पोलिस आणि रेल्वे सुरक्षा बलातील वरिष्ठ अधिकाऱ्यांनी सुरक्षा व्यवस्था कडक करण्याचे आदेश बुधवारी दिले आहेत. सुरक्षाव्यवस्थेत वाढ करा, संशयास्पद व्यक्तींना ताब्यात घेऊन त्यांची चौकशी करा, रेल्वे स्थानकांवर विशेष करून लांबपल्ल्याच्या मेल-एक्स्प्रेसमध्ये शोध मोहीम हाती घ्या अशा सूचना रेल्वे पोलिस आणि रेल्वे सुरक्षा बलातील वरिष्ठ अधिकाऱ्यांनी दिल्या आहेत. मुंबईतील लोकलमध्ये रोज लाखो लोक प्रवास करतात. त्यांच्या सुरक्षेच्या दृष्टीकोनातून हे निर्णय घेण्यात आले आहेत.
नुकत्याच काही घटना समोर आल्या. पुलवामा दहशतवादी हल्ला, आपटा येथे बसमध्ये सापडलेला बॉम्ब आणि कानपूर-भिवानी कालिंदी एक्स्प्रेस शौचालयातील दुर्घटना अशा अनेक घटना समोर आल्या आहेत. या सर्वांचा विचार करता हा हाय अलर्ट जारी केला आहे. गुप्तचर संघटनेने दिलेल्या माहितीनुसार, येत्या 3 महिन्यात मुंबई रेल्वे स्थानकांवर दहशतवादी हल्ला होण्याची शक्यता आहे. त्यामुळे मुंबईतील रेल्वे स्थानकांसाठी अतिदक्षतेचा इशारा देण्यात आला आहे. विशेषत: दिल्लीकडून येणाऱ्या मेल-एक्स्प्रेसमध्ये बॉम्बशोधक पथकाद्वारे आणि श्वान पथकाद्वारे तपासणी करण्याचे आदेश दिले गेले आहेत.