पुणे : पोलीसनामा ऑनलाईन
महाराष्ट्र राज्य माध्यमिक व उच्च माध्यमिक शिक्षण मंडळातर्फे घेण्यात येणाऱ्या १२ वीच्या फेरपरीक्षेचा निकालाची तारीख मंडळाकडून जाहीर करण्यात आली आहे. बारावीच्या फेरपरीक्षेचा निकाल शुक्रवारी (२४ ऑगस्ट) दुपारी एक वाजता जाहीर केला जाणार आहे. ही परीक्षा नऊ विभागीय मंडळांतर्फे घेण्यात आली होती. विद्यार्थ्यांना हा निकाल www.mahresult.nic.in या संकेतस्थळावर पाहता येईल.
संकेतस्थळावर विद्यार्थ्यांचे विषयनिहाय गुण उपलब्ध होतील. तसेच या निकालाची प्रिंटआऊटही घेता येईल. प्रत्यक्ष निकालाची प्रत हाती कधी मिळेल याबाबत मात्र अद्याप सांगण्यात आले नाही. १७ जुलै ते ४ ऑगस्ट या दरम्यान १२ वीची फेरपरीक्षा घेण्यात आली होती. फेब्रुवारी- मार्च २०१८ मध्ये पुणे, नागपूर, औरंगाबाद, मुंबई, कोल्हापूर, अमरावती, नाशिक, लातूर आणि कोकण अशा नऊ विभागीय मंडळांमध्ये सुमारे दोन हजार ८२२ परीक्षा केंद्रांवर बारावीची परीक्षा घेण्यात आली होती.