पुणे : पोलीसनामा ऑनलाईन – ‘राफेल’च्या फाईल चोरीचे प्रकरण देशभरात चांगलेच गाजत आहे. ‘राफेल’ खरेदी प्रकरणाची फाईल चोरीला गेल्याची माहिती कोर्टात देण्यात आली आहे. त्यावरून राष्ट्रवादीचे नेते अजित पवार यांनी मोदींना टोला लगावला आहे. ‘मोदी सरकारकडून राफेल खरेदीमधील घोटाळा झाकण्यासाठी राफेल फाईल जाळली असावी,’ असा आरोप अजित पवार यांनी केला आहे. हडपसर येथे राष्ट्रवादी काँग्रेसची संवाद यात्रा पवार यांच्या अध्यक्षतेखाली पार पडली. यावेळी ते बोलत होते.
यावेळी बोलताना पवार म्हणले, ‘ पुलवामा घटनेचे सत्ताधारी भाजपकडून मोठ्या प्रमाणात राजकारण करण्यात येत आहे. त्यानंतर पाकिस्तानला जशाच तसे उत्तर वायूसेनेकडून देण्यात आले. सर्वांनी वायूसेनेचे अभिनंदन करायला हवे. या हल्ल्याचे श्रेयही भाजपने घेतले असून, ज्या दहशतवाद्यांना मारले, त्याबाबतची आकडेवारी वायूदलाने सांगावी. मात्र, भाजपचे अध्यक्ष अमित शहा २५० जण मारल्याचे जाहीरपणे सांगत आहेत. त्यांना आकडेवारी सांगण्याचा अधिकार आहे का?’ असा सवाल पवार यांनी उपस्थित केला. त्याचबरोबर पुलवामा येथे सैन्य दलाच्या ताफ्यात ती गाडी गेली कशी आणि आपली गुप्तचर यंत्रणा काय करीत होती,असा सवालही त्यांनी उपस्थित केला’ .
हडपसर येथे राष्ट्रवादी काँग्रेसची संवाद यात्रा पवार यांच्या अध्यक्षतेखाली पार पडली. या वेळी दिलीप वळसे पाटील, अभिनेते अमोल कोल्हे, माजी मंत्री बाळासाहेब शिवरकर, माजी आमदार विलास लांडे, राष्ट्रवादी काँग्रेसचे शहराध्यक्ष चेतन तुपे, काँग्रेसचे शहराध्यक्ष रमेश बागवे यांच्यासह आजी – माजी पदाधिकारी उपस्थित होते.