नवी दिल्ली, वृत्तसंस्था : कोरोना विषाणूमुळे संपूर्ण जगातील अर्थव्यवस्था डबघाईस आली आहे. अशा परिस्थितीत भारतीय अर्थव्यवस्था वाचविण्यासाठी पंतप्रधान मोदींनी देशाला संबोधित करताना 20 लाख कोटी रुपयांचे आर्थिक पॅकेज जाहीर केले. त्यांनी लॉकडाऊन 4.0 चा संकेत देत देशात लोकल-व्होकल चा फॉर्मुला देखील दिला. पंतप्रधान नरेंद्र मोदी म्हणाले की, देशाच्या अर्थव्यवस्थेला वेगाने वाढवावे लागेल, केवळ वेग वाढवून चालणार नाही तर क्वांटम जंपही करावा लागेल.
या फॉर्मुल्याचा अर्थ असा आहे की आता भारत देश इतर देशांवर निर्भर राहणे हे पूर्वीपेक्षा कमी करेल. आता देशात, स्थानिक पातळीवर स्वयंरोजगाराच्या संधी उपलब्ध करुन देताना त्या त्या भागातील उत्पादित वस्तूंच्या वापरावर भर देण्यात येईल जेणेकरुन चिनी उत्पादनांचे प्रभुत्व कमी होऊ शकेल. पंतप्रधान मोदींनी यासाठी पीपीई किटचेही उदाहरण दिले. स्थानिक उत्पादनांच्या वापरावर जोर देताना पंतप्रधान मोदी म्हणाले की भारत हा जगासाठी एका बाजारासोबतच सर्वात जास्त मागणी असलेले क्षेत्रही आहे, त्याचा योग्य वापर करणे आवश्यक आहे.
पंतप्रधान नरेंद्र मोदी यांनी देशात उत्पादित उत्पादनांचा अधिकाधिक वापर करण्यावर भर देण्यामागील मुख्य कारण म्हणजे चीनसोबत भारताचे मुत्सद्दी संबंध. एकीकडे, संपूर्ण जग कोरोना विषाणूविरूद्ध लढाई लढत आहे आणि आपली अर्थव्यवस्था वाचविण्याचा प्रयत्न करीत आहे, तर चीन केवळ इतर देशांतील निर्यातीतून मिळवलेल्या पैशातून आपली गुप्त मोहीम राबविण्यात गुंतला आहे.
कोरोनाच्या या युद्धादरम्यान चिनी सैन एकीकडे लष्करी कवायती करीत आहे, तर दुसरीकडे शेजारच्या देशांवर लढाऊ विमान आणि हेलिकॉप्टर उडवून संबंधांमध्ये तणाव निर्माण करण्याचा प्रयत्न करीत आहे. लडाख आणि सिक्कीममध्येही चिनी सैन्य आणि भारतीय सैन्य यांच्यात तणाव कायम आहे. चीन कधीकधी एव्हरेस्टवर 5 जी तंत्रज्ञान स्थापित करण्यास सुरवात करतो. अशा परिस्थितीत आशियातील चीनचा वाढता प्रभाव कमी करण्याची क्षमता फक्त भारतामध्ये आहे, कारण तसे न केल्यास भारताच्या सामरिक हिताचे नुकसान होईल.
चीन असे कृत्य सातत्याने करत आहे, ज्यामुळे आशियाई देशांमध्ये आणि आंतरराष्ट्रीय स्तरावर चिंता निर्माण होईल. भारत, बांग्लादेश, म्यानमार, तैवान, जपान आणि दक्षिण कोरिया यासारख्या शेजारच्या देशांना सर्वाधिक त्रास सहन करावा लागत आहे. विशेष म्हणजे मोबाईल, संगणक, इलेक्ट्रॉनिक्स, फर्निशिंग, लाइटिंग यासह अनेक देशांतर्गत उत्पादनेही चीनमधूनच भारतात येतात, ज्यांचा आपण वापर करतो.
चीन आपली उत्पादने भारतात विकून खूप पैसे कमवतो, ज्याचा वापर ते आपल्या देशाच्या विकासासाठी आणि आशियासह संपूर्ण जगात आपले वर्चस्व राखण्यासाठी करतात. मुत्सद्दी स्तरावर चीनच्या या हालचालीवर विजय मिळवून भारतीय अर्थव्यवस्थेला पुनरुज्जीवित करण्यासाठी पंतप्रधान मोदींनी मंगळवारी लोकल आणि व्होकलचा नारा दिला.