1 लाखावर 40 हजाराचा फायदा, PM मोदी घेतात पोस्टाच्या ‘या’ स्कीमचा लाभ, जाणून घ्या
नवी दिल्ली : वृत्तसंस्था – टपाल विभाग (पोस्ट) हा सर्वसामान्य जनतेला नियमित बचतीची सवय लावण्यासाठी अत्यंत उपयुक्त विभाग आहे. पोस्टामध्ये कमीतकमी बचतही करता येते. त्यामुळे संकट काळी बचत केलेला पैसा उपयोगी पडतो. भारताचे पंतप्रधान नरेंद्र मोदी पंतप्रधान पदावर विराजमान झाले तेव्हा त्यांनी पोस्टाच्या अनेक योजनांचा प्रचार केला. त्यामुळे पोस्ट ऑफिसच्या बचत योजनांकडे लोकांचे आकर्षण वाढले आहे. पंतप्रधान नरेंद्र मोदी यांनी देखील पोस्टाच्या एका स्कीममध्ये गुंतवणूक केली आहे. जाणून घ्या पंतप्रधानांनी कोणत्या स्कीममध्ये पैसे गुंतवलेत.
पोस्ट ऑफिसच्या बचत योजनांचा चांगला परतावा मिळत असल्याने आणि पोस्टाच्या योजना या सुरक्षित असल्याचे मानले जात असल्याने पोस्टातील गुंतवणूक वाढत आहे. पोस्टाची अशी एक योजना आहे. त्यामध्ये तुम्ही 1 लाख रुपये गुंतवणूक केली तर त्यावर तुम्हाला तब्बल 40 हजार रुपयांपर्यंत व्याज मिळू शकते. याच योजनेत पंतप्रधान नरेंद्र मोदी यांनी गुंतवणूक केली आहे. नॅशनल सेव्हिंग सर्टिफिकेट (National Savings Certificates) असे या योजनेचे नाव आहे.
6.8 टक्के व्याज मिळते
नॅशनल सेव्हिंग सर्टिफिकेट या योजनेची मुदत पाच वर्षाची आहे. यामध्ये तुम्हाला 6.8 टक्के व्याजदर मिळतो. व्याजाची आकारणी वार्षिक स्वरुपात केली जाते. तुम्ही जमा केलेल्या रकमेवरील व्याज मात्र मुदत संपल्यानंतर जमा केले जाते. या योजनेमध्ये कमीत कमी 1 हजार रुपये देखील गुंतवता येतात. त्यामुळे 100 च्या गुणाकारात रक्कम गुंतवता येते.या स्किमचा आणखी एक फायदा असा आहे की, यामध्ये गुंतवणूक केल्यास आयकरात 80 सी अंतर्गत सुट मिळते. 80 सी ची मर्यादा 1.50 लाखापर्यंत आहे.
10 हजार गुंतवले तर 3890 रुपयांचा फायदा
जर तुम्ही नॅशनल सेव्हिंग सर्टिफिकेट या स्कीममध्ये 1 हजार रुपये गुंतवले तर तुम्हाला मुदत संपल्यानंतर 1389.40 रुपये परत मिळतात. म्हणजे 1 हजारावर 389.40 रुपयाचा फायदा होतो. याच प्रमाणे 10 हजार रुपये गुंतवले तर 13 हजार 890 रुपये आणि 1 लाख रुपये गुंतवले तर 38 हजार 949 रुपये व्याजाच्या स्वरुपात मिळतात. पोस्टाच्या या योजनेत 6.8 टक्के व्याज मिळते.
याच स्कीममध्ये PM मोदींची गुंतवणूक
पंतप्रधान नरेंद्र मोदी यांनी नॅशनल सेव्हिंग सर्टिफिकेट या स्कीममध्ये गुंतवणूक केली आहे. मागील वर्षी जाहीर केलेल्या माहितीनुसार पंतप्रधान नरेंद्र मोदी यांनी या स्कीममध्ये 84 हजार 321 रुपये गुंतवले आहेत.
कसे सुरु करायचे खाते ?
नॅशनल सेव्हिंग सर्टिफिकेट स्कीम तुम्हाला फक्त पोस्टात जाऊनच सुरु करता येते. महत्वाचे म्हणजे या स्कीममध्ये तीन लोकांना जॉईंट अकाऊंट स्वरुपात गुंतवणूक करता येते. हे खाते सुरु केल्यानंतर तुम्हाला पाच वर्षाची मुदत संपल्याशिवाय खाते बंद करता येत नाही. परंतु, स्किम धारकाचा दुर्दैवी मृत्यू झाला तर हे खाते बंद करता येऊ शकते.