‘IPL संपेपर्यंत मराठीत समालोचनाचा पर्याय द्या नाहीतर…’, डिस्ने हॉटस्टारला इशारा

मुंबई : पोलीसनामा ऑनलाइन – अ‍ॅमेझॉन अ‍ॅपमध्ये मराठीचा समावेश करण्यासंदर्भातील मोहिमेनंतर आता महाराष्ट्र नवनिर्माण सेनेने आपला मोर्चा डिस्ने हॉटस्टारकडे ( diseny-hotstar) वळवला आहे. सध्या सुरु असणाऱ्या इंडियन प्रिमियर लीग ( (IPL) म्हणजेच आयपीएलदरम्यान सामन्यांचे समालोचन (Commentary) मराठीत (marathi-option) करावे, याकरिता मनसेने डिस्ने हॉटस्टार कंपनीला पत्र ( letter) पाठवलं आहे.

यासंदर्भातील माहिती मनसेच्या कामगार सेनेचे चिटणीस केतन नाईक यांनी ट्विटरवरुन दिली आहे. तसेच कंपनीने वेळेत यासंदर्भात निर्णय घेतला नाही तर मनसे स्टाईलने आंदोलन करावे लागेल व त्यामुळे उद्भवणाऱ्या सर्व परिस्थितीची जबाबदारी आपली राहील याची नोंद घ्यावी, असंही मनसेनं म्हटलं आहे.

सध्या आयपीएलचे समालोचन हिंदी, इंग्रजी, तेलगु, कानडी आणि बंगाली भाषेमध्ये उपलब्ध असून अ‍ॅपमध्ये मराठीचा पर्याय दिला नसल्याचे मनसेने म्हटल आहे. आपल्या कंपनीचे मुख्य कार्यालय मुंबईत आहे. त्याचप्रमाणे आयपीएलचा मोठा प्रेक्षक वर्ग हा मराठी आहे, असे असतानाही तुम्हाला मराठीचा विसर पडल्याचे दिसत आहे, अशा शब्दात मनसेने कंपनीला खडेबोल सुनावले आहेत. हॉटस्टार डिस्नेच्या ओटीटी प्लॅटफॉर्मवर इतर प्रदेशिक भाषांप्रमाणे मराठी भाषेचा पर्याय उपलब्ध करुन द्यावा अशी मागणी करणारे पत्र आहे.

आयपीएलचा यंदाचा हंगाम संपण्याआधी कंपनीने मराठी भाषेमध्ये समालोचन ऐकण्याचा पर्याय उपलब्ध करुन द्यावा अशी विनंती या पत्रात मनसेने केली आहे. आय.पी.एल. क्रिकेट सामान्यांची कॉमेंट्री मराठीत करण्यास कुठल्याही प्रकारची अडचण आली तर आम्ही आवश्यक ते सहकार्य करू, पण नुसतीच चालढकल केलीत तर महाराष्ट्र सैनिकांशी गाठ आहे हे लक्षात असुद्या असे नाईक यांनी ट्विटमध्ये म्हटले आहे. तर अन्य एका ट्विटमध्ये नाईक यांनी क्रिकेट सामान्यांची कॉमेंट्री मराठी भाषेत का नसावी. महाराष्ट्रात एकापेक्षा एक असे उत्तम समालोचक (Commentator) आहेत. गरज असल्यास आम्ही शोधून देऊ, असेही ते म्हणाले आहेत.