कोल्हापूरच्या रांगणा किल्ल्यावर पार्टी करण्यासाठी गेलेल्यांना मारहाण, जोरदार राडा

कोल्हापूर : पोलीसनामा ऑनलाइन – जिल्ह्यातले चार तरुण कोल्हापूरच्या रांगणा किल्ल्यावर फिरायला गेले होते, तेव्हा त्यांना एक ग्रुप दारू आणि बकरा घेऊन पार्टी करण्यासाठी आलेले दिसले. किल्ल्यावर दारू प्यायला बंदी आहे, असं सांगत या चौघांनी पार्टी करायला आलेल्या एकासोबत हाणामारी केली. या व्यक्तीला काठीने मारून नाक घासायला लावलं, तसंच या सगळ्याचं व्हिडिओ शूटिंग करून व्हायरलही केलं. या मारहाणीत युवक जखमी झाल्यामुळे त्याला रुग्णालयात नेण्यात आलं.

ही घटना २६ जानेवारीची आहे. किल्ल्यावर मारहाण झाल्यानंतर युवकाने ग्रामस्थांना किल्ल्याच्या पायथ्याशी बोलवून घेतलं. गावातल्या तरुणाला मारणाऱ्या या चौघांचा शोध त्यांनी घेतला आणि कोल्हापूरला परत जात असताना त्या चौघांनाही पकडलं. खोलीमध्ये कोंडून त्यांना बेदम मारहाण करण्यात आली आणि त्यांनाही नाक घासून माफी मागायला लावण्यात आली. या सगळ्या राड्यानंतर पोलिसांनी ऋषीकेश माने, प्रसाद माने, उमेश माने आणि विजय गुरव यांच्याविरुद्ध गुन्हा दाखल केला आहे. स्वत:ला शिवप्रेमी म्हणवणाऱ्या ऋषिकेश मानेचे याआधीही असे प्रकार समोर आले होते.