आगामी लोकसभा निवडणुकीसाठी शिवसेनेने भाजप सोबत युती केल्यापासून शिवसेनेत लोकसभा निवडणूक लढण्याची इच्छा अनेक शिवसैनिकांनी व्यक्त केले आहे. त्यामुळे शिवसेनेत पक्षांतर्गत वाद निर्माण झाले आहेत. त्यालाच शिवसेना पक्षप्रमुख उद्धव ठाकरे यांनी आपल्या ठाकरी शैलीत मिटवण्याचा प्रयत्न केला आहे. तुमचे अंतर्गत वाद मिटले नाहीत तर तो मतदारसंघ भाजपला सोडून मी मोकळा होईल असे उद्धव ठाकरे म्हणाले आहेत.
उस्मानाबाद, हिंगोली, परभणी या तीन लोकसभा मतदारसंघात लोकसभा निवडणुकीच्या निमित्ताने मोठी गटबाजी उफाळली आहे. उस्मानाबाद, परभणी या दोन मतदारसंघातील विद्यमान खासदारांना पुन्हा उमेदवारी देऊ नये असे स्थानिक शिवसैनिकांनी म्हणले आहे. प्रा. रवींद्र गायकवाड यांच्या बद्दल स्थानिक शिवसैनिक नाराज आहेत. रवींद्र गायकवाड यांनी मतदारसंघात कोणतीच कामे केली नाहीत म्हणून त्यांना उमेदवारी देण्यास स्थानिक शिवसैनिकांनी विरोध केला आहे. मी उमेदवार देईल त्याचे काम करा , अन्यथा मतदारसंघ मी भाजपला सोडेल असे उद्धव ठाकरे म्हणाले आहेत.