‘लोकांनी व्हिडीओ बनवण्याऐवजी मदत केली असती , तर माझा भाऊ वाचला असता’

मुंबई : पोलीसनामा ऑनलाईन – मुंबईतील छत्रपती शिवाजी महाराज टर्मिनस रेल्वे स्थानकाजवळ पादचारी पुलाचा भाग कोसळल्याची घटना समोर आली . या अपघातात 6 जणांचा मृत्यू झाला तर 31 जखमी झाले आहेत. या दुर्घटनेत वडिलांसोबत खरेदीसाठी क्राॅफर्ड मार्केटमध्ये गेलेल्या जाहिद खान या 32 वर्षीय तरुणाचाही मृत्यू झाल्याचे समोर आले आहे . एरवी एखादी दुर्घटना घडली तर मुंबईकर तातडीने मदतीला धावून जात असतात. परंतु यावेळी मुंबईकरांचं काही वेगळंच चित्र पाहायला मिळालं . जाहिदला मदत करण्याऐवजी लोक मोबाईलमध्ये व्हिडीओ बनवण्यात व्यस्त होते असे त्याच्या भावाने म्हटले आहे.

जाहिद हा घाटकोपर येथील रहिवासी होता . काही सामानाची खरेदी करण्यासाठी जाहिद गुरुवारी वडिलांसोबत मार्केटमध्ये जात होता. यावेळी सीएसएमटीजवळचा रस्ता खालून क्राॅस करून जाण्याऐवजी ते यावेळी पुलावरून गेले आणि काळाने घाला घातला . सदर पूल कोसळला. या दुर्घटनेत त्याचे वडिल सिराज खान जखमी झाले . परंतु जाहिद खान याचा यात मृत्यू झाला . त्याच्या वडिलांनी त्याला उचलून रुग्णालयात नेलं. परंतु तोपर्यंत खूप उशीर झाला होता.

यावेळी बोलताना त्याच्या भावाने म्हटले की , “वाईट गोष्ट म्हणजे माझे काका तिथे असलेल्या लोकांकडे मदत मागत होते. परंतु कोणीही मदत करण्यास पुढे आलं नाही. सर्वजण मोबाईलमध्ये व्हिडीओ बनवत होते. जर व्हिडीओ न बनवता त्यांनी मदत केली असती तर आज माझा भाऊ जिवंत असता. “अशी संतप्त प्रतिक्रिया जाहिदचा भाऊ कमाल खानने दिली.

Get real time updates directly on you device, subscribe now.

You might also like
WhatsApp WhatsApp us