गोव्यात पालिका निवडणुका एप्रिलपर्यंत पुढे ढकलल्या ; आयोगाची अधिसूचना जारी

पणजी : वृत्तसंस्था –  राज्य निवडणूक आयोगाने सोमवारी एक अधिसूचना जारी केली आहे. राज्यातील सर्व नगरपालिकांच्या निवडणुका आणखी तीन महिन्यांनी म्हणजे एप्रिलपर्यंत पुढे ढकलण्यात आल्या आहेत. त्यामुळे गोवा राज्यातील पणजी महापालिकेसह अन्य पालिकांच्याही निवडणुका एप्रिलमध्ये होतील. जानेवारी व फेब्रुवारीच्या कालावधीत विविध सरकारी अधिकारी याना कोविड लसीकरणाच्या मोहिमेत अधिक जबाबदाऱ्या आहेत. अशावेळी पालिकांच्या निवडणुका घेऊन आम्ही या अधिकाऱ्यांवर अतिरिक्त कामाचा बोजा टाकू शकत नाही आणि त्यामुळेच निवडणुका तीन महिन्यांनी पुढे ढकलण्यात येत असल्याचे राज्य निवडणूक आयुक्त चोखाराम गर्ग यांनी जाहीर केले आहे.

तसेच साखळी व फोंडा वगळता अन्य सर्व नगरपालिकांची मुदत संपलेली आहे. जिल्हा पंचायत निवडणुका निवडणूक आयोगाने कोविड संकट काळात घेतल्या. मात्र त्या देखील उशिराच पार पडल्या. पालिकांच्या निवडणुका फेब्रुवारीच्या अखेरीस किंवा मार्चच्या पहिल्या आठवड्यात होतील असे सर्वांनाच वाटले होते. मात्र ते शक्य नाही हे सोमवारी स्पष्ट झाले. एप्रिलपर्यंत आम्ही निवडणुका घेणे पुढे ढकलत आहोत असे निवडणूक आयोगाने जाहीर करून अनेकांना आश्चर्याचा धक्का दिला आहे.

एक तर एप्रिलमध्ये निवडणुका किंवा आम्ही ठरवू त्या तारखेला निवडणुका होतील असे आयोगाने म्हटले आहे. निवडणुका पुढे ढकलताना आयोगाने दिलेले कारण ही महत्वाचे आहे. पण अनेक पालिकांची प्रभाग फेररचना तसेच आरक्षण प्रक्रिया पूर्ण होण्यास अजून महिन्याभराचा कालावधी जाणार आहे. पणजी महापालिकेची मुदत मार्च महिन्यात संपते. अन्य पालिकांची मुदत यापूर्वीच संपलेली आहे, त्यात डिचोली, कुंकळ्ळी, कुडचडे काकोडा, काणकोण, मडगाव, मुरगाव, पेडणे, केपे, सांगे व वाळपई या पालिकांचा समावेश होतो. पालिका निवडणुकांसोबतच जिल्हा पंचायतीच्या नावेली मतदारसंघासाठीही निवडणूक होणार आहे.