दारूला पैसे न दिल्याने मामलेदार कचेरीजवळ तरुणाचा दगडाने ठेचून खून

पुणे : पोलीसनामा ऑनलाइन – दारु पिण्यासाठी पैसे न दिल्याने तरुणाच्या डोक्यात दगड घालून खुन केल्याची घटना उघडकीस आली आहे. खडक पोलिसांनी आरोपीला अटक केली असून खून झालेल्या तरुणाची अद्याप ओळख पटलेली नाही. ही घटना मामलेदार कचेरीच्या जवळील फुटपाथवर पहाटे पावणे दोन वाजण्याच्या सुमारास घडली. बाबासाहेब कुऱ्हाडे (वय ३५, रा. हडपसर) असे अटक केलेल्या आरोपीचे नाव आहे.

याबाबत पोलिसांनी सांगितले की, बाबासाहेब कुऱ्हाडे हा हडपसरला राहणारा असून काल रात्री तो शिवाजी रोडवर फिरत होता. त्यावेळी त्याने या तरुणाकडे दारू पिण्यासाठी पैसे मागितले होते. त्याने नकार दिल्याने त्यांच्यात वाद झाला. तेव्हा त्याने या तरुणाला धमकी दिली. तो तरुण निघून गेल्यावर कुऱ्हाडे हा त्याच्या मागोमाग गेला. तेव्हा हा तरुण मामलेदार कचेरीजवळील एका फुटपाथवर झोपत असल्याचे त्याच्या लक्षात आले. मध्यरात्री पावणे दोनच्या सुमारास कुऱ्हाडे हा तेथे आला. त्याने जवळच असलेला दगड उचलून या तरुणाच्या डोक्यात घातला.

या तरुणाच्या आरडाओरड्याने लोकांना हा प्रकार लक्षात आला. त्यांनी तातडीने पळून जात असलेल्या कुऱ्हाडे याला पकडले. या घटनेची माहिती मिळताच खडक पोलीस तातडीने घटनास्थळी पोहचले. त्यांनी कुऱ्हाडेला ताब्यात घेतले. खुन झालेल्या तरुणाची अद्याप ओळख पटलेली नसून तो फिरस्ता असावा, असा पोलिसांचा संशय आहे.

आरोग्यविषयक वृत्त –

हे पदार्थ खा राहाल कायम ‘हेल्दी’

लठ्ठपणामुळे लहान मुलही होऊ शकतात उच्च रक्तदाबाचे ‘बळी’

गर्भवती महिलांना हे संकेत मिळाले तर त्यांची प्रसूती कधीही होऊ शकते.

रक्तदानामुळे शारीरीक आणि मानसिक आरोग्य राहते चांगले