‘आत्मनिर्भर’ भारतासाठी PM मोदींनी दिला पाच ‘I’ चा फॉर्म्युला, अर्थव्यवस्थेला बळकट करण्याचे ‘लक्ष्य’

नवी दिल्ली : वृत्तसंस्था – कोरोना व्हायरसशी लढत असलेल्या भारतीय अर्थव्यवस्थेला चालना देण्यासाठी सरकार सतत प्रयत्न करत आहे. याबाबत मंगळवारी पंतप्रधान नरेंद्र मोदींनी भारतीय उद्योग संघाच्या (सीआयआय) वार्षिक सभेला संबोधित केले. यावेळी पंतप्रधान म्हणाले की, आमचे सरकार खासगी क्षेत्राला देशाच्या विकास प्रवासात भागीदार मानते. ते म्हणाले, भारताला पुन्हा वेगवान विकासाच्या मार्गावर आणण्यासाठी, आत्मनिर्भर भारत निर्माण करण्यासाठी ५ गोष्टी फार महत्वाच्या आहेत. त्या पाच गोष्टी आहेत- इन्टेन्ट म्हणजे हेतू, इन्क्लुजन म्हणजे समावेश, इन्व्हेस्टमेंट म्हणजे गुंतवणूक, इन्फ्रास्ट्रक्चर म्हणजे पायाभूत सुविधा आणि इनोव्हेशन म्हणजे नाविन्य. ते म्हणाले की, आत्मनिर्भर भारत मोहिमेशी संबंधित प्रत्येक व्यक्तीची काळजी घेतली जाईल. मी तुमच्यासह सर्व भागधारकांशी सतत संवाद साधतो आणि हे पुढेही सुरूच राहिल. ग्रामीण अर्थव्यवस्थेत गुंतवणूकीचा आणि शेतकर्‍यांसह भागीदारीचा मार्ग खुलण्याचा पूर्ण लाभ घ्या.

मेट्रो कोचची निर्यात करत आहे भारत
ते म्हणाले, आता गावाजवळ स्थानिक कृषी उत्पादनांच्या क्लस्टर्ससाठी आवश्यक पायाभूत सुविधा तयार केल्या आहेत. यात सीआयआयच्या अनेक सदस्यांसाठी बर्‍याच संधी आहेत. आज देश मेट्रो कोचची निर्यात करत असल्याचे ते म्हणाले. देशाने वंदे भारत सारखी ट्रेन बनवली आहे. गेल्या तीन महिन्यांतच पीपीईचा उद्योग भारतीय उद्योजकांनीच तयार केला आहे.

देशात ३ महिन्यात पीपीई किटची शेकडो कोटींची इंडस्ट्री
मोदी म्हणाले, मी अगदी अभिमानाने म्हणेन की फक्त ३ महिन्यांतच पीपीईचा शेकडो कोटींचा उद्योग तुम्हीच तयार केला आहे. ते म्हणाले की, मेक इन इंडियाला देशातील रोजगाराचे प्रमुख माध्यम बनवण्यासाठी अनेक प्राथमिक क्षेत्रांची ओळख केली गेली आहे. तीन क्षेत्रांवर काम सुरू देखील झाले आहे. ते म्हणाले, ‘देशात अशी उत्पादने तयार करण्याची गरज आहे, जी मेड इन इंडिया असतील आणि मेड फॉर द वर्ल्ड असतील.’

पंतप्रधान म्हणाले, आपल्याला आता एका अशा बळकट स्थानिक पुरवठा साखळीमध्ये गुंतवणूक करायची आहे, जी जागतिक पुरवठा साखळीमध्ये भारताच्या सहभागाला बळकट करेल. या मोहिमेमध्ये सीआयआयसारख्या मोठ्या संघटनेलाही कोरोनानंतर नव्या भूमिकेत पुढे यावे लागेल. पुढे ते म्हणाले, ‘भारतीय उद्योगाकडे एक स्पष्ट मार्ग आहे- आत्मनिर्भर भारताचा मार्ग. आत्मनिर्भर भारत जागतिक अर्थेव्यवस्थेसह पूर्णपणे एकत्रित आणि समर्थक असेल. आपल्याला अशी एक स्थानिक पुरवठा साखळी तयार करायची आहे, जी जागतिक पुरवठा साखळीत मोठी भूमिका बजावेल.’ तसेच जग एक विश्वासार्ह भागीदार शोधत आहे, भारताकडे क्षमता आणि सामर्थ्य आहे, असेही ते म्हणाले.

आज संपूर्ण जगात भारतासाठी जो विश्वास निर्माण झाला आहे, त्याचा तुम्ही सर्वांनी, भारतीय उद्योगाला पुरेपूर फायदा घेतला पाहिजे. आत्मनिर्भर भारताचा अर्थ आपल्याला आणखी बळकट होऊन जगाला दाखवायचे आहे. मोदी म्हणाले, ‘भारताने कोरोना संकटावेळी १५० हुन अधिक देशांमध्ये औषधे पाठवून माणुसकीच्या भलाईचे काम केले आहे. आज जगात भारताबद्दल निर्माण झालेल्या विश्वासाचा फायदा उद्योग जगताने घेतला पाहिजे. आपल्या कामगारांचे कल्याण लक्षात घेऊन रोजगाराच्या संधी वाढवण्यासाठी कामगार सुधारणाही केल्या जात आहेत. ज्या खासगी क्षेत्राला परवानगी नव्हती अशी क्षेत्रे देखील उघडली गेली आहेत.’

MSME सेक्टरची नव्याने व्याख्या
मोदी म्हणाले, सरकार ज्या दिशेने वाटचाल करत आहे, ते खाण क्षेत्र असो, ऊर्जा क्षेत्र असो किंवा संशोधन व तंत्रज्ञान असो, प्रत्येक क्षेत्रात उद्योगांनाही संधी मिळतील आणि तरुणांसाठी रोजगाराची नवीन दारे खुली होतील. बऱ्याच काळापासून उद्योग क्षेत्र एमएसएमईची व्याख्या स्पष्ट करण्याची मागणी करत होते, ती पूर्ण झाली आहे. यामुळे एमएसएमई त्यांचा व्यवसाय कोणतीही चिंता न करता करू शकतील आणि त्यांना एमएसएमईची स्थिती राखण्यासाठी इतर मार्गांचा अवलंब करावा लागणार नाही.

मोदी म्हणाले की, ‘देशातील सामरिक क्षेत्रातही खासगी क्षेत्राचा सहभाग एक वास्तव बनत आहे. स्पेस, अणु उर्जा यासारख्या क्षेत्रात प्रत्येक संधी उद्योजकांच्या प्रतीक्षेत आहेत. बऱ्याच काळापासून एमएसएमईची व्याख्या बदलण्याची मागणी होत होती. आमच्या सरकारने हे काम केले आहे.’ ज्याच्याकडे एवढा मोठा कोळशाचा साठा आहे, तरीही त्या देशात बाहेरून कोळसा येतो, ही विचार करण्यासारखी बाब आहे. कधी सरकार अडथळा बनले आणि कधी धोरणे. सरकारने कोळसा क्षेत्राला या निर्बंधांपासून मुक्त करण्याचे काम केले आहे. शेतीत स्वातंत्र्यानंतर जे नियम बनले, त्यात शेतकऱ्यांना मध्यस्थांच्या हाती सोडले गेले होते. अनेक दशकांपासून होत असलेल्या अन्यायातून सरकारने शेतकऱ्यांना मुक्त करण्याचा प्रयत्न केला आहे. शेतकरी आता त्याचे पीक स्वत:च्या अटीवर विकू शकतो. तो कोणत्याही राज्यात जाऊन आपले पीक विकू शकतो.

कोरोना विरुद्ध अर्थव्यवस्था पुन्हा बळकट करणे, हे आमच्या सर्वोच्च प्राधान्यांपैकी एक आहे. त्यासाठी तातडीने जे निर्णय घेण्याची गरज आहे, ते निर्णय सरकार घेत आहे. आणि सोबतच असे निर्णय घेण्यात आले आहेत, जे देशाला दीर्घकाळ मदत करतील. या निर्णयांतर्गत आम्ही अनेक क्षेत्रे भविष्यासाठी तयार केली आहेत. आपल्यासाठी सुधारणा पद्धतशीर, इंटिग्रेटेड आणि परस्पर जोडल्या आहेत. ते म्हणाले, भारताला पुन्हा वेगवान विकासाच्या मार्गावर आणण्यासाठी आत्मनिर्भर भारत निर्माण करण्यासाठी ५ गोष्टी फार महत्वाच्या आहेत. हेतू, समावेश, गुंतवणूक, पायाभूत सुविधा आणि नाविन्य.

पोलीसनामा न्युज आता टेलीग्रामवर... आमचं चॅनेल (@policenamanews) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.
W3Schools
You might also like