धुळे : पोलीसनामा आॅनलाइन – पैशांच्या जोरावर आणि गुंडगिरी करून निवडणूक जिंकण्याचे तंत्र भाजपने सध्या सुरू केले आहे. जळगाव, जामनेरमध्ये जे झाले तेच धुळ्यात होत आहे. भाजपमध्ये गुंडांना उघडपणे प्रवेश देऊन भाजपचे धुळे महापालिका निवडणूक जिंकण्याचे प्रयत्न आहेत. गुंडांना पक्षाच्या कार्यक्रमात व्यासपीठावर शेजारी बसविले गेल्याने भाजपची ही गुंडगिरी आहे, अशी टीका राष्ट्रवादी काँग्रेसचे नेते अजित पवार यांनी केली. ते धुळ्यातील जाहीर सभेत बोलत होते.
अजित पवार म्हणाले, की देशात सध्या अस्वस्थतेचे वातावरण निर्माण झालेले असून, राज्यात आघाडी सरकारची सत्ता असताना मराठा समाजाला सोळा टक्के आरक्षण देण्याचा निर्णय झाला होता. याचबरोबर मुस्लिम समाजालाही पाच टक्के आरक्षण देण्याचा महत्त्वपूर्ण निर्णय घेण्यात आला आणि उच्च न्यायालयाने आरक्षणालादेखील मान्यता दिली होती. भाजपमध्ये सध्या अनेकांना प्रवेश दिला जात असून, त्यात गुंड, माफियांचा प्रामुख्याने समावेश आहे. तुम्ही कोणालाही पक्षात घ्या, मात्र मनपाची सत्ता मिळविण्यासाठी गुंडांना घेण्याचे समर्थन करणाऱ्यांनी भारतीय लोकशाहीचा आणि मतदारांचा अपमान केला आहे. शहरातील तथाकथित गुंडाने पोलिस अधिकाऱ्यावर हल्ला केला होता. अशा गुंडास आश्रय देवून पोलिस दलाचाही अवमान केला आहे, अजित पवार यांनी म्हटले.
काँग्रेस अल्पसंख्याक सेलचे इर्शाद जहांगीरदार यांनी राष्ट्रवादी काँग्रेसमध्ये प्रवेश केला. या वेळी शहरातील चाळीसगाव रोडलगत आएशा मशिदीच्या मैदानावर राष्ट्रवादीचा मेळावा घेण्यात आला. या वेळी मेळाव्याला विधानसभेचे माजी सभापती अरुण गुजराथी, आमदार डॉ. सतीश पाटील, माजी आमदार राजवर्धन कदमबांडे, रामकृष्ण पाटील, महापौर कल्पना महाले, माजी आमदार अपूर्व हिरे, जिल्हाध्यक्ष किरण शिंदे, संदीप बेडसे आदींसह राष्ट्रवादीचे धुळे, जळगाव, नंदुबार येथील पदाधिकारी व कार्यकर्ते मोठ्या संख्येने मेळाव्याला उपस्थित होते.