महत्वाच्या बातम्या

केंद्र सरकारची मोठी घोषणा , ग्रॅच्युइटी करमुक्त !

नवी दिल्ली : वृत्तसंस्था – लोकसभा निवडणुकीची आचारसंहिता लागू होण्याआधी भूमिपूजन, उद्घाटन, लोकार्पणाचा धडाका लावला आहे. केंद्रातील नरेंद्र मोदी सरकारने नोकरदारांनाही खिशात टाकण्यासाठी मोठी घोषणा केली आहे. करमुक्त ग्रॅच्यइटीची मर्यादा १० लाखावरुन २० लाख रुपये करुन त्यांनी डबल धमाका केला आहे.

पियूष गोयल यांनी १ फेब्रुवारीला जाहीर केलेल्या अंतरिम अर्थसंकल्पात त्यांनी करमुक्त ग्रॅच्युइटीची मर्यादा दुप्पट करण्याची घोषणा केली होती. याची अंमलबजावणी आता सुरु झाली आहे. वर्षाभरापूर्वी निवृत्त झालेल्या आणि नंतर निवृत्त होणाऱ्या लाखो कर्मचाऱ्यांना या सुधारणेचा लाभ मिळणार आहे.

कंपनीत दहा किंवा त्याहून अधिक कर्मचारी काम करतात, अशा कंपन्यांमध्ये पाच किंवा त्याहून अधिक वर्ष नोकरी करणाऱ्या कर्मचाऱ्यांना ग्रॅच्युइटी दिली जाते. सुरुवातीला खासगी क्षेत्रातील कर्मचाऱ्यांना १० लाखापर्य़ंतची ग्रॅच्युइटी करमुक्त होती. परंतु आता ती २० लाख रुपये करण्यात आली आहे. मागील मार्च महिन्यामध्ये ‘ग्रॅच्युइटी अदायगी सुधारणा’ विधेयकाला लोकसभेत मंजुरी देण्यात आली होती.त्यानंतर, कामगार मंत्रालयानं २९ मार्च २०१८ रोजी या संदर्भातील अधिसूचना जारी केली होती. आता ११ महिन्यांनंतर केंद्रीय अर्थमंत्री अरुण जेटली यांनी ट्विटरवरून या करमुक्तीची घोषणा केली आहे.

प्राप्तिकर कायद्याच्या कलम १०(१०)(iii) अन्वये २० लाख रुपयांपर्यंतची ग्रॅच्युइटी करमुक्त करण्यात आली आहे. त्यामुळे सरकारी कर्मचाऱ्यांसह पेमेंट ऑफ ग्रॅच्युइटी अ‍ॅक्टमध्ये समावेश नसलेल्या कर्मचाऱ्यांनाही फायदा होऊ शकेल, असं जेटलींनी ट्विटमध्ये म्हटलंय. अर्थात, कोणत्या तारखेपासून ही करसवलत लागू असेल, हे सरकारने स्पष्ट केलेलं नाही.

१ फेब्रुवारीला जाहीर झालेला अंतरिम अर्थसंकल्प हा एक प्रकारे निवडणूक जाहीरनामाच होता. त्यात, शेतकरी, असंघटित कामगार आणि मध्यमवर्गीय नोकरदारांसाठी सरकारनं मोठ्या घोषणा केल्या होत्या. त्यापैकी गरीब शेतकऱ्यांच्या खात्यात दरवर्षी ६ हजार रुपये जमा करण्याच्या योजनेचा शुभारंभ गेल्याच महिन्यात झाला. त्याचंच पुढचं पाऊल म्हणून या ग्रॅच्युइटी करमुक्तीच्या ट्विटकडे पाहता येईल.