नवी दिल्ली : वृत्तसंस्था – पेटीएम ( Paytm) लवकरच आपल्या दुकानदार ग्राहकांना नवीन सुविधा देणार आहे. पुढील वर्षी मार्चपर्यंत दुकानदारांना एक हजार कोटी रुपयांचे कर्ज ( Loan) वितरीत करण्याचं लक्ष्य ठेवलं आहे. दुकानदारांना कर्ज देण्याच्या योजनेअंतर्गत बिझनेस ॲप्स वापरकर्त्यांना कोणत्याही गॅरंटीशिवाय ( Gurantee) कर्ज देणं सुरू ठेवणार असल्याची माहिती सोमवारी पेटीएमनं ( Paytm) दिली. पेटीएमने दिलेल्या माहितीनुसार, सध्या आपल्याकडे १.७ कोटी दुकानदार असून, त्या आधारावर व्यवसाय क्षेत्राला १ हजार कोटी रुपयांचं कर्ज देण्यात येणार असल्याची माहिती कंपनीने दिली आहे.
या कर्जाच्या रकमेद्वारे दुकान मालक आपला व्यवसाय डिजिटल करू शकतील किंवा व्यवसाय चालवण्यासाठी निराळ्या मार्गाचा अवलंबही करू शकतील. यामुळे दुकानदारांची कार्यक्षमता सुधारेल आणि डिजिटल भारत या मोहिमेतही त्यांना सहभागी होण्यास मदत मिळेल, असे पेटीएमने म्हटले आहे. दुकानदारांच्या दररोजच्या देवाण-घेवाणीवर पेटीएम त्यांना किती कर्ज द्यायला हवं हे ठरवत असतं. तसंच त्यानंतर एनबीएफसी आणि बँकांसोबत भागीदारीत काहीही तारण न ठेवता त्यांना कर्ज उपलब्ध करून दिलं जात आहे.
गेल्या आर्थिक वर्षात ५५० कोटींचं कर्ज
दुकानदारांना दिले जाणारे हे कर्ज दैनंदिन सेटलमेंटच्या आधारे केली जाते आणि वेळेपूर्वी फेडण्यात येणाऱ्या कर्जावर कोणतीही फी आकारली जात नाही. यामध्ये दुकानदारांना विना वारंटी आणि कमी व्याज दरावर पाच लाख रुपयांपर्यंत कर्ज दिले जाते. यावर्षी एक हजार कोटींचे लक्ष्य ठेवण्यात आले असून, मागील वर्षी १ लाखाहून अधिक व्यापारी भागीदारांना ५५० कोटी रुपयांची कर्जे दिली असल्याचा दावा पेटीएमकडून करण्यात आला आहे.