Coronavirus : पिंपरी चिंचवड शहरात ‘कोरोना’ रुग्णांच्या संख्येत घट, आज 233 नवीन रुग्णांची नोंद

पिंपरी/पुणे : पोलीसनामा ऑनलाइन – मागील काही दिवसांपासून पिंपरी चिंचवड शहरात कोरोना बाधित रुग्ण आढळून येण्याचे प्रमाण घटले आहे. शहरात नवीन रुग्ण आढळून येण्याचे प्रमाण घटले असताना रुग्ण बरे होण्याचे प्रमाण वाढल्याने ही दिलासादायक बाब मानली जात आहे. आज दिवसभरात शहरामध्ये 233 कोरोनाचे रुग्ण आढळून आले आहेत तर 12 रुग्णांचा कोरोनामुळे मृत्यू झाला आहे.

शहरात कोरोना बाधित रुग्णांची संख्या 85 हजारांच्या पुढे गेली असून आजपर्यंत शहरात 85 हजार 114 कोरोनाचे रुग्ण आढळून आले आहेत. 472 रुग्णांची दुसऱ्या चाचणीचा अहवाल निगेटिव्ह आल्याने त्यांना रुग्णालयातून घरी सोडण्यात आले आहे. आतापर्यंत 80 हजार 752 रुग्णांनी कोरोनावर मात केली असून त्यांना रुग्णालयातून डिस्चार्ज देण्यात आला आहे. शहरात रुग्णांची संख्या घटत असताना मृत्यूचे प्रमाण देखील कमी झाले आहे.

गेल्या 24 तासामध्ये शहरात कोरोनामुळे 12 रुग्णांचा मृत्यू झाला आहे. यामध्ये 7 रुग्ण हे पालिका हद्दीबाहेरील आहेत तर 5 रुग्ण हे शहरातील आहेत. आज मृत्यू झालेल्या रुग्णांमध्ये चिंचवड, पिंपरी, भोसरी, सांगवी, थेरगाव, काळेवाडी, आळंदी, जुन्नर, शिवाजीनगर, शेंडेवाडी येथील रुग्णांचा समावेश आहे. आतापर्यंत शहरात 2060 रुग्णांचा कोरोनामुळे मृत्यू झाला असून यामध्ये 1464 शहरातील तर 596 पालिका हद्दी बाहेरील आहेत. सध्या शहरामध्ये 2209 सक्रीय रुग्ण असून त्यांच्यावर पालिका रुग्णालय, कोविड केअर सेंटरमध्ये उपचार सुरु आहेत.