Pune : बिल्डरची गोळी झाडून हत्या झालेली घटना ताजी असताना वानवडीत वाळू सप्लायरवर गोळीबार, प्रचंड खळबळ

पुणे : पोलिसनामा ऑनलाइन – पुण्यात बिल्डरची गोळी झाडून हत्या झाल्याचे प्रकरण मिटत असताना पुन्हा एक गोळीबार घडला असून, वानवडी भागात एका वाळू सप्लायर तरुणावर अज्ञातांनी गोळीबार केल्याची धक्कादायक घटना घडली आहे. घटनास्थळी पोलीस दाखल झाले असून, गोळीबार करणारे पसार झाले आहेत. यामुळे शहरात खळबळ उडाली आहे.

मयूर हांडे (वय 32, रा. वानवडी) असे गोळीबारात जखमी झालेल्या तरुणाचे नाव आहे. याप्रकरणी वानवडी पोलीस ठाण्यात गुन्हा दाखल करण्याचे काम सुरू करण्यात आले आहे.

मिळालेल्या माहितीनुसार, मयूर हे वाळू सप्लायर आहे. दरम्यान ते पावणे एक वाजण्याच्या सुमारास हांडे वाडी रोडने जात असताना श्रीराम चौकात अज्ञात हल्लेखोरांनी त्यांच्यावर गोळीबार केला. यात एक गोळी मयूर यांच्या गालाला चाटून गेली आहे. यात ते जखमी झाले असून, त्यांना खासगी रुग्णालयात दाखल करण्यात आले आहे. माहिती मिळताच घटनास्थळी वानवडी पोलीस व गुन्हे शाखेच्या पथकांनी धाव घेतली आहे.

दरम्यान आठ दिवसांपूर्वीच पुणे आयुक्तांलयाजवळ गोळी झाडून एका बांधकाम व्यावसायिकाची हत्या केली होती. त्यात आता आणखी एक गोळीबार घडल्याने शहरातील कायदा सुव्यवस्थेचा प्रश्न उपस्थित झाला आहे.