Pune : प्राण्यांची तस्करी करणार्‍या आंतरराष्ट्रीय रॅकेटचा पुण्यात ‘पर्दाफाश’; लोहमार्ग पोलिसांकडून आफ्रिकन जातीचे तब्बल 279 कासव, 230 मासे अन् 1200 सरडे जप्त
file photoपुणे : पोलीसनामा ऑनलाइन – पुणे लोहमार्ग पोलिसांच्या पथकाने प्राण्यांची तस्करी करणारे आंतरराष्ट्रीय रॅकेट उघडकीस आणत दोघांना पकडले आहे. या दोघांकडून तब्बल 279 कासव आणि 1 हजार 200 सरडे जप्त केले आहेत. पकडलेली कासवे व सरडे हे आफ्रिकन जातीचे आहेत. त्यामुळे राज्यासह देशात खळबळ उडाली आहे.
याप्रकरणी तरुणकुमार मोहन (वय 26, चेन्नई) आणि श्रीनिवास कमल (वय 20, तामिळनाडू) अशी ताब्यात घेतलेल्या दोघांची नावे आहेत. याबाबत पुणे लोहमार्ग गुन्हा दाखल करण्यात आला आहे.
पोलीस अधीक्षक सदानंद वायसे पाटील यांनी दिलेल्या माहितीनुसार, पोलिसांना चेन्नई एलटीटी एक्सप्रेस या रेल्वे गाडीतून प्राण्यांची तस्करी होणार असल्याची माहिती मिळाली होती. त्यानुसार ही गाडी पुणे रेल्वे स्थानकात आल्यानंतर शोध घेतला गेला. यावेळी दोघा संशयितांना पकडले. त्यांच्याकडे असलेल्या चार ट्रॅव्हल्स बॅगेची तपासणी केली. त्यावेळी 279 कासव, वेगवेगळ्या जातीचे 1207 सरडे आणि 230 मासे जप्त करण्यात आले आहेत.
चार पथके तयारकरून येणाऱ्या-जाणाऱ्या गाडीची तपासणी करण्यात आली. त्यावेळी मंगळवारी पुणे ते लोणावळा दरम्यान चेन्नई एलटीटी एक्सप्रेस गाडीत या दोघांना पकडले आहे. त्यांच्याकडे कोणत्याही प्रकारच्या वाहतुकीचा परवाना आणि कागदपत्रे नव्हती. चौकशीत हे सर्व प्राणी त्यांनी चैनई येथून मुंबई येथे घेऊन जाणार असल्याचे सांगितले आहे. काही प्राणी हे विदेशी असून, ते सीमाशुल्क विभागाच्या ताब्यात देण्यात आले आहेत. ताब्यात या दोघांनाही सीमाशुल्क विभागाच्या ताब्यात दिले आहे.
ही कारवाई पोलीस अधीक्षक सदानंद वायसे पाटील यांच्या मार्गदर्शनाखाली स्थानिक गुन्हे शाखा पोलीस निरीक्षक मौला सय्यद, कर्मचारी सुनील भोकरे, जगदीश सावंत यांच्या पथकाने केली आहे.