पिंपरी : पोलिसनामा ऑनलाईन – पतीच्या मारहाणाला कंटाळून पत्नीने पतीच्या डोक्यात दगड घालून खून केल्याची धक्कादायक घटना घडली आहे. या प्रकरणी पोलिसांनी पत्नीला ताब्यात घेतले आहे. ही घटना सोमवारी रात्री नऊच्या सुमारास हिंजवडी पोलीस ठाण्याच्या हद्दीत पुनावळे येथे उघडकीस आली.
गजानन निसार (३०, रा. पांढरे वस्ती, पुनावळे, मूळ- छत्तीसगड) याचा खून झाला आहे. तर राणू गजानन निसार (२४, रा. पुनावळे) हिला ताब्यात घेण्यात आले आहे. पोलिसांनी दिलेल्या माहितीनुसार गजानन आणि त्याची पत्नी राणू हे दोघे बिगारी काम करतात. ते पूनावळे येथे राहत होते. गजानन हा नेहमी दारू पिऊन पत्नी राणू हिच्याशी वाद घालत तसेच तिला मारहाण करत. यामुळे दोघांमध्ये नेहमीच वादावादी होत होती.
सोमवारी दुपारी गजानन हा दारू पिऊन घरी आला. त्यावेळेस तो पत्नी राणू हिच्यासोबत वाद घालू लागला. यावेळी दोघांमध्ये कडाक्याचे भांडण झाले. रागाच्या भरात राणूने पती गजानन याच्या डोक्यात दगड घातला. यामध्ये गंभीर जखमी झाल्याने आणि मोठ्या प्रमाणावर रक्तस्त्राव झाल्याने त्याचा मृत्यू झाला. याची माहिती मिळाल्यानंतर हिंजवडी पोलीस घटनास्थळी पोहचले असून तपास सुरू केला आहे. गजानन याला दिड वर्षाची मुलगी आहे.