रेखा जरे हत्या प्रकरण : पत्रकार बाळ बोठेच्या जामीन अर्जावर ‘या’ दिवशी निर्णय

अहमदनगर : पोलीसनामा ऑनलाइन – यशस्विनी महिला ब्रिगेडच्या अध्यक्षा व राष्ट्रवादी काँग्रेसच्या कार्यकर्त्या रेखा जरे यांच्या हत्या प्रकरणातील मुख्य आरोपी पत्रकार बाळ बोठे व दुसरा आरोपी सागर भिंगारदिवे एकमेकांच्या संपर्कात होते. घटनेच्या दिवशी आणि त्याआधीही ते एकमेकांच्या संपर्कात आल्याचे पुरावे पोलिसांना मिळाले आहेत, असा दावा सरकार पक्षातर्फे कोर्टात करण्यात आला आहे. तर भिंगारदिवे याने जुन्या रागातून बोठेला अडकविल्याचा युक्तिवाद आरोपीच्या वकिलांनी केला. बोठेच्या अटकपूर्व जामीन अर्जावर न्यायालय बुधवारी (दि. 16) निकाल देणार आहे.

बोठेच्या वतीने केलेल्या अटकपूर्व जामीन अर्जावर मंगळवारी जिल्हा व सत्र न्यायाधीश एम. आर. नातू यांच्यासमोर सुनावणी झाली. आरोपीतर्फे ॲड. महेश तवले यांनी युक्तिवाद केला. त्यांनी न्यायालयात सांगितले की, आरोपी बोठे याने तो काम करत असलेल्या वृत्तपत्रात ‘हनी ट्रॅप’संबंधी वृत्तमालिका प्रकाशित केली होती. त्यामध्ये एका भागात यातील आरोपी सागर भिंगारदिवे याच्याबद्दल लिहिले होते. त्याचे उद्योग उघडकीस आल्याने त्या रागातून त्याने या गुन्ह्यात बोठेचे नाव घेतले आहे. याशिवाय दुसरा पुरावा आणि ठोस कारण पोलिसांकडे नाही, असे तवले यांनी सांगितले.

जिल्हा सरकारी वकील सतीश पाटील यांनी हा युक्तिवाद खोडून काढला. ते म्हणाले की, या हत्येचे नेमके कारण अद्याप स्पष्ट झालेले नाही. हनी ट्रॅपचेच कारण आहे का हेही अद्याप पुढे आलेले नाही. केवळ भिंगारदिवे याने नाव घेतले म्हणून बोठेला आरोपी केले नाही. पोलिसांना तसे सबळ पुरावे मिळालेले आहेत. भिंगारदिवे आणि बोठे यांच्यात वितुष्ट होते तर ते एकमेकांच्या संपर्कात कसे होते. 24 नोव्हेंबर व घटना घडली त्या 30 नोव्हेंबर या दिवशी या दोघांत मोबाइलवरून वेळोवेळी संभाषण झाल्याचे पुरावे पोलिसांना मिळाले आहेत.

याशिवाय जरे यांच्या घराच्या झडतीत त्यांच्याच हस्ताक्षरातील एक पत्र मिळाले असून, त्यात आरोपीपासून आपल्या जीवाला धोका असल्याचे लिहिलेले आहे. या सर्व पुराव्यांची पडताळणी करायची आहे. त्यासाठी आरोपीची अटक आवश्यक असल्याचे पाटील यांनी कोर्टात सांगितले. न्यायालयाने दोन्ही बाजूंचा युक्तिवाद ऐकून घेतला. यासंबंधीची कागदपत्रेही घेतली आहेत. त्यावर आता बुधवारी (दि. 16) निकाल देण्यात येणार आहे.