विजयानंतर अहिल्यादेवींचे दर्शन घेऊन रोहित पवार राम शिंदेंच्या घरी

अहमदनगर : पोलीसनामा ऑनलाइन – पालकमंत्री राम शिंदे यांना पराभवाची धूळ चारणारे राष्ट्रवादीचे युवा नेते रोहित पवार यांनी आज सायंकाळी चौंडी येथे येऊन पुण्यश्लोक अहिल्यादेवी होळकर यांच्या मूर्तीचे दर्शन घेतले. त्यानंतर पालकमंत्री राम शिंदे यांच्या घरी जाऊन त्यांची भेट घेतली. शिंदे यांनी फेटा बांधून पवार यांचा सत्कार केला.

संपूर्ण राज्याचे लक्ष लागलेल्या कर्जत-जामखेड विधानसभा मतदारसंघात रोहित पवार व पालकमंत्री राम शिंदे यांच्यात चांगलाच संघर्ष पेटला होता. पालकमंत्री शिंदे यांचा शरद पवार यांचे नातू रोहित पवार यांनी 42 हजार मतांनी पराभव केला. रोहित पवार यांनी राजकीय परिपक्वता दाखवत पालकमंत्री प्रा. राम शिंदे यांच्या घरी जाण्याचा बेत आखला. त्यांनी चौंडीत जाऊन पुण्यश्लोक अहिल्यादेवी होळकर यांच्या मूर्तीचे दर्शन घेतले. त्यावेळी त्यांच्यासोबत काही निवडक कार्यकर्ते होते. तेथून पवार हे पालकमंत्री शिंदे यांच्या निवासस्थानी गेले. तिथे पालकमंत्री शिंदे यांच्या आईचे दर्शन घेतले. त्यानंतर शिंदे यांनी पवार यांचे अभिनंदन करीत फेटा बांधून त्यांचा सत्कार केला. रोहित पवार हे शिंदे यांच्या घरी येताच कार्यकर्त्यांनी मोठी गर्दी केली होती.

Visit : Policenama.com