शेअर बाजारात ‘घसरगुंडी’ ! गुंतवणूकदारांना बजेटची चिंता; बाजार 956.66 अंकांनी गडगडला

पोलीसनामा ऑनलाईन – मुंबई शेअर बाजारात गेल्या चार दिवसांपासून सेन्सेक्सची घसरगुंडी सुरुच आहे. केंद्र सरकार 1 फेब्रुवारीला बजेट सादर करणार आहे. परंतू, गुंतवणूकदारांना बजेटपूर्व चिंतेने ग्रासल्याने आणि नफेखोरी सुरु झाल्याने बुधवारी (दि. 27) सेन्सेक्स जवळपास 956.66 अंकांनी कोसळला आहे. गेल्या चार दिवसामध्ये सेन्सेक्स 2,350 अंकांनी घसरला आहे. गुंतवणूकदारांनी नफेखोरीसाठी विक्रीचा सपाटा लावल्याने सेन्सेक्सवर दबाव आला. यामुळे सेन्सेक्स कोसळल्याचे जाणकारांचे मत आहे. तर दुसरीकडे निफ्टीचाही बाजार उठला असून 2 टक्क्यांची घसरण झाली असून सेनसेक्स 13950 वर आहे.

बुधवारी सेन्सेक्समध्ये मोठी घसरण झाली. बाजार बंद होते वेळी सेन्सेक्स 956.66 अंकांनी कोसळून 47,390.93 वर स्थिरावला आहे. जवळपास सर्व बँकांचे शेअर कोसळले आहेत. 21 जानेवारीला सेन्सेक्सने 50181 ची पातळी गाठली होती. मात्र, त्यानंतर लगेचच शेअर बाजारात पडझड सुरु झाली आहे.

64 टक्के शेअरमध्ये घसरण
मुंबई शेअर बाजारावर (बीएसई) 2,987 कंपन्यांचे शेअर लिस्टेड आहेत. यापैकी 918 शेअर वाढलेले आहेत, तर 1930 शेअर घसरलेले आहेत. म्हणजेच एक्स्चेंजवर 64 टक्के शेअर लाल निशान्यावर आहेत. गेल्या चार दिवसांपासून होत असलेल्या पडझडीमुळे लिस्टेड कंपन्यांचे एकूण मार्केट 189.31 लाख कोटी झाले आहे. NSE चा निफ्टीदेखील 304 अंकांनी घसरला असून 13,934.70 वर आहे. टाटा मोटर्स आणि डॉ. रेड्डीजचे शेअर सर्वाधिक पडले आहेत. तर विप्रो, एसबीआय लाईफच्या शेअरमध्ये वाढ झाली आहे. रिलायन्स, बजाज फायनान्स TCS, HDFC च्या शेअरमध्येही घसरण झाल्याचे दिसून येत आहे.

सोन्या- चांदीच्या दरातही घट… .
आज सोन्या, चांदीच्या दरात मोठी घसरण झाली. सोमवारी 49,143 रुपये प्रति 10 ग्रॅमवर बंद झालेले सोने आज 323 रुपयांनी घसरले. 48,903 रुपये प्रति 10 ग्रॅमवर उघडलेले सोने आज 48810 रुपये प्रति तोळ्यावर बंद झाले आहे. तर दुसरीकडे चांदीच्या दरातही मोठी घसरण झाली आहे. सोमवारी चांदी 66,535 रुपये प्रति किलोवर बंद झाली होती. आज चांदी 304 रुपयांच्या घसरणीने सुरु झाली. चांदीने सुरुवातीला 66,045 रुपये प्रति किलोचा दर गाठला होता. सध्या चांदी 352 रुपयांनी घसरली आहे.