मुख्यमंत्री ठाकरे यांच्यावर 12 हजार कोटीचा घोटाळ्याचा आरोप

मुंबई – पोलीसनामा ऑनलाईन – मुलुंड येथे 5 हजार खाटांचे रुग्णालय उभारण्यासाठी 22 एकर जमीन खरेदी करण्याच्या व्यवहार झाला आहे. मात्र हा संपूर्ण व्यवहार संशयास्पद असून हा 12 हजार कोटींचा घोटाळा (cm-uddhav-thackeray-land-scam-worth-rs-12000-crore) आहे. या रुग्णालयाच्या उभारणीचा खर्च मुंबईकरांनी भरलेल्या कराच्या रकमेतून होणार आहे. मुंबईकरांनी हा भुर्दंड का सोसावा ? असा प्रश्न विचारत या संपूर्ण व्यवहाराची लोकायुक्तांमार्फत चौकशी करावी, अशी मागणी भाजपा नेते किरीट सोमय्या ( Kirit Somaiya) यांनी राज्यपाल भगतसिंह कोश्यारी ( Bhagat Singh Koshyari) यांच्याकडे केली आहे. याबाबतची सर्व कागदपत्रे पाहून त्यावर योग्य ती कार्यवाही करू, असे राज्यपाल कोश्यारी यांनी आपल्याला सांगितल्याच सोमय्या यांनी माध्यमांना सांगितले.

सोमय्या यांनी शुक्रवारी राज्यपाल कोश्यारी यांची भेट घेऊन त्यांना याबाबतचे निवेदन दिले आहे. निवेदनात सोमय्या यांनी म्हटले आहे की, मुख्यमंत्री ठाकरे यांनी बृहन्मुंबई महापालिका आयुक्तांना मुंबईत 5 हजार खाटांचे रुग्णालय उभारण्यासाठी तातडीने 22 एकर जागा अधिग्रहित करण्याचे आदेश दिले. हे आदेश देताना कोणत्याही पातळीवर चर्चा झाली नव्हती, रुग्णालय उभारण्याबाबतचा आवश्यक तो अहवालही तयार केला नव्हता. मुख्यमंत्र्यांच्या आदेशानुसार महापालिका आयुक्त इक्बाल सिंग चेहल यांनी जमीन अधिग्रहित करण्याचे आदेश पालिका अधिकाऱ्यांना दिले. या सर्व प्रक्रियेत असे दिसते की कोणती जमीन अधिग्रहित करायची याचा निर्णय आधीच झाला असावा. त्या नुसार मुलुंड येथील जमीन अधिग्रहीत करण्याची प्रक्रिया अत्यंत जलदगतीने पार पडला असा आरोप सोमय्या यांनी मुख्यमंत्री ठाकरेंवर केला आहे.

तसेच जमीन अधिग्रहीत करण्यासाठी वृत्तपत्रातून जाहिरात देऊन निविदा मागविण्याचे सोपस्कार पार पाडले गेले. आणि स्वास कन्स्ट्रक्शन या कंपनीचा प्रस्ताव मान्य केला. या स्वास कन्स्ट्रक्शनकडे संबंधित जागेचे मालकी हक्क, लीझ हक्क आहेत का वगैरे कायदेशीर बाबींची पडताळणी न करताच त्यांचा प्रस्ताव मान्य केला गेला, असे कागदपत्रांची पाहणी केल्यावर दिसते.

राज्य सरकारकडे आवश्यक त्या वैद्यकीय सुविधा नसल्याने कोविड उपचारासाठी अन्यत्र उभी केलेली जम्बो केंद्र खासगी डॉक्टरांकडे हस्तांतरित केली आहेत, असे असताना 5 हजार खाटांचे रुग्णालय चालविणे राज्य सरकार आणि महापालिकेला शक्य होणार आहे का? याचा विचार न करताच रुग्णालय उभारण्याचा प्रस्ताव मंजूर केला गेल्याचे सोमय्या यांनी म्हटलं आहे.हा संपूर्ण व्यववहार संशयास्पद असून त्याची चौकशी करण्याचे आदेश द्यावेत, अशी मागणी सोमय्या यांनी राज्यपालांकडे केली आहे.

You might also like