पुणे शहर आणि ग्रामीण पोलिस दलातून विभाजन होऊन १५ ऑगस्ट रोजी पिंपरी-चिंचवड पोलीस आयुक्तालय सुरु करण्यात आले. यासाठी पुणे शहर-ग्रामीण पोलिस दलातून सुमारे साडे सतराशे मनुष्यबळ देण्यात आले असून यातील ३७० ग्रामीण पोलीस दलातील आहेत. मात्र हे मनुष्यबळ सध्या आयुक्तालयासाठी कमी आहे. त्यामुळे स्वतंत्र भरती प्रक्रिया राबविण्याबाबतही आराखडा देण्यात आला होता. मात्र, भरती प्रक्रिया राबविण्यासाठी आवश्यक बाबी पिंपरी-चिंचवड आयुक्तालयाकडे नाहीत. त्यामुळे भरती प्रक्रिया राबविणे अवघड असून, मनुष्यबळ मिळण्यात अडचणी येत होत्या.
पुणे आणि पिंपरी-चिंचवड आयुक्तालयाची भौगोलिक रचना, घडणाऱ्या गुन्ह्यांचे प्रमाण आणि पिंपरी-चिंचवडला आवश्यक असलेले मनुष्यबळ यात बरीच तफावत आहे. तसेच पुणे शहर-ग्रामीण पोलिस दलाकडून देण्यात आलेले पोलिस, वाहने आणि अध्यादेश यातील तफावत पोलीस आयुक्त पद्मनाभन आणि अतिरिक्त आयुक्त मकरंद रानडे यांनी पालकमंत्री गिरीश बापट यांच्या निदर्शनास आणून दिले होते. मागील आठवड्यात मुख्यमंत्री देवेंद्र फडणवीस यांनी आयुक्तालयाचे उद्घाटन केले, तेव्हाही सादरीकरणाद्वारे हीच बाब मुख्यमंत्र्यांसह महासंचालक दत्ता पडसलगीकर यांच्यासमोर पोलीस आयुक्तानी मांडली होती.
नागपूर येथे १३ ते १८ जानेवारी दरम्यान राज्य पोलिस विभागाच्या ३१ व्या क्रीडा स्पर्धा पार पडल्या. स्पर्धेचे उद्घाटन मुख्यमंत्र्यांच्या हस्ते १६ तारखेला झाले. सतरा तारखेला राज्यातील सर्व आयपीएस अधिकाऱ्यांची पडसलगीकर यांनी बैठक घेतली. त्या वेळी राज्यात येऊ घातलेल्या निवडणुकांसह एकंदरीत कायदा-सुव्यवस्थेबाबत चर्चा झाली. त्यावेळी पिंपरी चिंचवड आयुक्तालयातील मनुष्यबळाचा विषय झाला. यावेळी राज्यातील इतर जिल्ह्यांतून किमान ३०० ते ५०० पोलिस देण्याविषयी आणि स्वतंत्र पोलीस भरती करण्याविषयी निर्णय झाला आहे. यास पोलीस आयुक्त आर. के. पद्मनाभन यांनी दुजोरा दिला आहे.